حدث فى مثل هذا اليوم

ياعالم يا بشر يا ناس
ازف اليكم هذا النبا
انه فى مثل هذا اليوم الموافق 6اكتوبر عام 1986 الساعه السابعه مساءا تم ميلادى
تخيلوا يعنى المتحدثه اليكم الان كملت بالتمام والكمال 24 سنه
ياااااااااااااااااااااااااااااااااه
انتوا متخيلين انا عشت قد ايه انا عشت كتير قوى يا جماعه فى الدنيا دى
معلش هتعب سيادتكم حبه صغننه وهاتوا اله حاسبه واحسبوا معايا علشان تعرفوا انى عشت كتييييير قوى قوى قوى واللى مش عنده اله يفتح الكلكوليتر بتاع الموبيل

انا عشت 24سنه
8760 يوم
210240 ساعه
12614400 دقيقه
756864000 ثانيه

يالهووووووووووووووووووووووووى ( لما اشوف كده عملت فيهم ايه ) ( العالم فى مئه عام انا فى 24 عام )


ذنوبى

فى دراسه المانيه بتقول ان لو شخص معين مثلا عمره 40 وكان معدل النوم بتاعه طبيعى من 7:8 ساعات فى اليوم فهو تقريبا بينام 20 سنه من عمره هحسبها واشوف الكلام ده بجد ولا لا اصل لو كده يبقا تمام ليه لان كده نص عمرى طاير مش هتحاسب عليه لان ليس على النائم حرج اصلى لو ما ينطق من قول الا لديه رقيب عتيد يبقا انا خلاص فى سقر وما ادراك ما سقر لاتبقى ولا تذر مش بقولكم عشت كتير فى الدنيا دى واكيد ذنوبى فيها لا تعد ولا تحصا وبعدين قولوا اول عشر سنين من عمرى براءه بص بعد كده مضيت اتفاقيه مع شوشو يسرى فى عروق البنى ادم مننا مسرا الدم فذنوبى كثيره وعظيمه وربنا يستر ما تلقيش بيا الى التهلكه
فاللهم يارب اشكو اليك ذنوبى فاغفر لى يا ارحم الراحمين

احلامى

والله ما عارفه اذا كنت حققت احلامى فى الفتره اللى فاتت دى ولا لا بس زى ما بيقولوا الاسيه ما تتنسيش اهم حلم فى حياتى وهو انى ادخل كليه هندسه ما اتحققش بس طبعا الخيره فيما اختاره الله لى ولا اعتراض على قضاء الله
بس انا بقيت حاسه انى بخاف احلم لانى عارفه انها ممكن مش تتحق وبعدين لو مش اتحققت وانا زعلت يبقا انا بعترض على قضاء ربنا ولانى لازم اكون مؤمنه وراضيه بقضاء الله فى خيره وشره فلازم اجبر نفسى على الرضا يعنى ارضيها بالعافيه
ولو مر عليا حلمى اللى كان وافتكرته المفروض الغيه من ذاكرتى علشان ما فيش حاجه تعكر صفو حياتى
او بلاش الكلام اللى فوق ده علشان مش حلو وممكن اكون سياسيه ودبلوماسيه شويه مع نفسى واقول انا مش هبطل احلم بس هنقى احلامى يعنى بلاش احلم باحلام محكوم عليها بالوءد قبل ما تتولد لانها احلام غير قابله للتحقيق (unachievable)
بس برضه خايفه انى اخنق نفسى فى حلقه الاحلام واقعد اختار الحلم ده ينفع والحلم ده لا لحد ما القى نفسى فى مشكله تانيه خالص الا وهى العمر والوقت يا صديقى
يمكن لما اقتنع بحلم معين ولسه هبدا بتحقيقه يرن المنبه معلنا انتهاء الوقت كان زمان فات الميعاد فتصبح احلامى هنا عديمه القيمه والفائده
لذا سوف ارجع الى صوابى ولن انقى احلامى ولن اختارها حتى لا يداهمنى قطار الوقت بل سوف احلم لانى بدون حلم سوف اموت ولا يهمنى حققتها ام لا فقط يكفينى لذه ونشوه الحلم

اسمع دى

	Nogomi.com Mohamed Mounir .mp3
	Found at bee mp3 search engine

شكلى

والله يا شيخ حاجه غريبه امال ابص فى المرايه مش لاقيه حاجه اتغيرت فيا العنين هيا هيا المناخير وما ادراك ما المناخير هيا هيا لالالا استنى يمكن خسيت شويه مش عارفه مش حاسه بفرق لما كنت 20 ولما بقيت 24
طيب ليه ؟ لانى عايشه فى نفسى ومع نفسى فاى تغير هيحصلى واكيد ده حاصل ما انا مش حاسه بيه واى تغير هيطرا عليا لن اراه انا بل يلاحظه من له فتره لم يرانى عندها فقط سوف نستيقظ على الحقيقه المره اننا كبرنا وان ملامحنا تغيرت وان بعض الخطوط بدات تاخذ مكانها بين عينى نيجه ضحكتى التى سبق ورسمها الزمان فى سابق عهدى اما الان فتركت خطوطها وذهبت ولا اعرف سوف تعود مره اخرى ام لا ( دى حته نكد بس انا عمر الضحكه ما تختفى من على وشى ههههه)
نصيحه اخويه
حاول تقابل حد رخم اديلك فتره ما شفتوش علشان يفوقك من وهمك ويقولك ايه ده انتى كبرتى واتغيرتى خالص او حاول تضحك على نفسك وتقابل حد من بتوع خدمه توصيل النفاق لحد البيت علشان يوقلك ايه ده انت مش بتتغير ابدا زى ما انت وهتفضل كده طول عمرك قمر (امر بالستر)

المستوى الثقافى (كل المجالات )
افتكر ان اهم انجاز ثقافى حققته على مدار 24سنه هو قرايتى فى الكتب دى
البدايه والنهايه للحافظ بن كثير
رياض الصالحين للشافعى
تنبيه الغاقلين لابو الليث السمر قندى
الفوائد وكتب اخرى لابن القيم
الفقه على المذاهب الاربعه
ومعظم ما قال وكتب مصطفى محمود
وكل كلمه كتبها عبدالوهاب مطاوع
وجميع حلقات اثر قلبى وفتى احلامى حتى وهو فى الستون من عمره ادهم صبرى
نساء النبى لبنت الشاطى (محمود المصرى )
3/4 كتب كريم الشادلى كتاب لشريف صبرى اشعار فؤاد حداد
الاعجاز العلمى لدكتور زغلول النجار
جزءمن اشعار فاروق جويده & معظم اشعار صلاح جاهين
كتاب نادر الوجود وفريد المعلومات اسمه عيون الاخبار لابى محمد عبدالله بن مسلم بن قتيبه الدينورى الهيئه العامه لقصور الثقافه
كفاحى هتلر الاخوان المسلمون فرح الروح لسيد قطب ....................................... كتير ده اللى افتكرته البخلاء للجاحط ده قريته وانا فى اولى ثانوى كنت اسيب كل الكتب الفاشله بتاعت المدرسه واقعد اقرا نوادر البخلاء عايز اقول انى بكره الفلسفه وعمرى ما قريت فيها حتى وانا فى اولى ثانوى جبت فيها 3 من عشرين ودى طبعا حاجه لازم افتكرها والمدرسين نجحونى فيها كده بالزق علشان خاطر ابويا ههههههههههه ( وصمت عار بس لازم تذكر )
نسيت اذكر واحد الايام دى لاعب جامد فى طريقه تفكيرى االاهو احمد خالد توفيق الراجل ده كنز وبلال فضل طبعا
يعنى مهما قريت ومهما اتعلمت فبحر العلم كبير ومات المعلم ولا اتعلم

اصحابى
سبحان الله الاصحاب دول نعمه كبيره قووووى من عند ربنا وياسلام لو كانوا زى اصحابى . اولا انا اصحابى هما هما اللى من ابتدائى لحد ما انا بكتب الكلام ده واحده منهم معايا اهى زى ما احنا ينى تقدروا تقولوا عمر ماشى يمكن نختلف يمكن نبعد شويه لكن فى الاخر نرجع نتلم تانى شله الانس والمنتخب هما ( اميره & اسراء & نشوى & اسماء & ايمان ) ربنا يخليكم ليا يارب .

العباده
الواحد مهما عبد ربنا فاكيد عمره ما هيكون اوفا بجزءصغير من نعم ربنا عليه وانا الحقيقه مقصره جدا جدا جدا فى حق ربنا عليا
يعنى الصلاه الخشوع مش دائم فيها واخشى ان تتحول مع الايام الا ان تصبح صلاتى عاده وليست عباده فاللهم ارزقنى الخشوع فى الصلاه يارب
النفاق والرياء الواحد ممكن يعمل حاجه ومش قاصدبيها ان يراى او ينافق حد وتبص تلاقى اللى يقول بركاتك ياعم فتحس انك كنت مراى وتقعد تانب فى نفسك انك عملت كده فبرضه بسال ربنا ان يرزقنا الاخلاص فى القول والفعل والعمل واعوذ بك من الكذب والنفاق والرياء
عباده الله للتجاره ساعت كتير بحس انى بعبد ربنا زى التاجر اللى عايز حاجه قصاد حاجه يعنىصلى وصام لامر كان يطلبه فلما انقضاءالامر لا صلى ولا صام انا والله مشبكون قصده بس بقيت الحظها فيا ودى حاجه وحشه فاللهم يارب اعنا على طاعتك وذكرك وحسن عبادتك
الصيام احمدك يارب انى تعودت من صغرى على صيام الاثنين والخميس بس بحس فى اوقات كتير انى ما جنتيش من صيامى ده الا الجوع والعطش لان شوشو يسرى فى عروق مسرا الدم فاللهم يارب ثبتنى على الصيام
اما القيام فده كان زمان ممكن اصلى واتسابق انا واحمد اخويا اننا نشترى قيراط فى الجنه دلوقتى احمد اخويا اكتفى بما اشترى وانا تكاسلت ورفعت شعار النوم عباده وسلوت نفسى بان الله لا يكلف نفسا الا وسعها
اللهم قونى على قيام الليل الذكر (مثل الذى يذكر الله والذى لا يذكر الله كمثل الحى والميت ) اعتقد انى مازلت قادره على التنفس نوعا ما ( ربى حقا ما عبدتك خلال 24 حق عبادتك وما قدرتك حق قدرك فاغفر لى زلتى واقبل معذرتى واعطنى سؤالى واقضى حاجتى يارب ذى الجلال والاكرام )





انا هسيب الجزء ده فاضى لان مش عارفه الواحد عمل ايه تانى فى حياته يمكن تكون حاجات كويسه ويمكن تكون حاجات وحشه بس كل اللى انا عارفه انى زدت سنه او بالاصح نقصت سنه من عمرى وان الموت قادم لامحاله اشعر بقربه فكل ما هو ات قريب واشعر ان سوف اموت صغيره السن ولكن ليست هذه هى المكشله ولكن المشكله حقا هى ان يخدعنى الوقت فامضى قبل ان اترك لنفسى ميراثا عذبا يتذكرنى الناس به ويتجرعه الظمان فيرتوى !




فى النهايه

كل سنه وانا طيبه