2010/07/19

هيدلينا تعيشى ليهم وتموتينا






اول اول امبارح كنت قاعده كده مع نفسى وفجأه كده والله العظيم قررت انى اتصل بصحبتى دكتوره رانيا احجز معاها معاد انى اجيلها المستشفى علشان عايزه اتبرع بالدم


اهوه رمضان جاى والواحد يكفر عن ذنوبه شويه بشويه دم من عنده ومنه كمان الواحد يجدد من خلاياه وخير قطره يحبها الله عين بكت من خشيه الله وقطره دم فى سبيله وامال اقنع نفسى انى لازم اروح لانى بينى وبينكم خوافه جدا وبعمل فرح واطنطط زى القرد علشان ابره تدخل فى ايدى


المهم مش عارفه عملت ايه ونسيت اتصل بيها لحد امبارح بالصدفه برضه بامسك الدستور لقيت فى الصفحه الاولى خبر غير طبيعى وغير عادى بالمره قال قال ان محكمه النقض المصريه تبرىء المتهمين فى قضيه اكياس الدم الفاسده


انا ذهلت طبعا من الحكم مع ان ناس كتير كان منتظره حكم البراءه ده يصدر باعتقاد ان الادانه دى كانت من الحاقدين على الصناعه المصريه والذين لا يريدون تقدم الاقتصاد او الصناعه المصريه ( ربنا وحده اللى يعلم بنفوس عباده )

وكمان يمكن زى راى احمد اخويا اللى بعتبره رجل وطنى الصنع ( نسبه لائنتمائه للحزب الحاكم ) اللى بيقول فيه عمرك سمعتى عن ان مواطن مصرى مات باكياس دم هيدلينا يا شيخه حرام عليكى ده حتى انتى كده تزعلى كريم عبدالعزيز منك


مع علينا من راى احمد خالص


ومع ايمانى ان القضاه لا سلطه عليهم فاكيد ان الحكم ده صدر نتيجه لوجود ادله ماديه بائنه لا رجعه فيها

كل الكلام ده حلو بس هى بجد اكياس غير فاسده ؟

عمر ما كان فيه نار بدون رماد وما افتكريش ان قضيه زى دى تقعد سنين فى المحاكم علشان فى الاخر يقولوا شكرا شدينا انتباهكم والاكياس طلعت سليمه ومش فاسده ولا حاجه ده يبقا اسمه كلام فاضى

اللى متابع القضيه من الاول وكان قرا راى الاطباء كان عرف ان التخزين السىء اللاكياس ممكن يتسبب فى حدوث خلطات وسرطانات وغيره من الامراض الفتاكه للاشخاض المنقول لهم او منهم الدم

علشان كده افتكر انه كان اقل حق للمواطن المصرى واللى المفروض القانون كان يراعيه ان يفصح لنا عن المتسببين فى التخزين السىء او الاسباب التى ادت الى سوء التخزين فى مخازن الصحه قبل ان يبراء هذا او يدين هذا
ارجع برضه وارد على نفسى بس براى اخويا الوطنى الصنع ( اللى بيقول فيه )

يعنى هو كان حد ياختى قالك عن قضيه مرسيدس لما هيقولولك عن هيدلينا

هارجع برضه وارد واقول يمكن انا عمرى ما فكرت ان اجيب عربيه مرسيدس بس فكرت انى اتبرع بالدم

تفتكروا هيكون مصير نا ايه بعد براءه هيدلينا


وبعد كل الكلام اللى يفتح النفس ده للتبرع بالدم لسه عايز تتبرع ؟؟؟


دعوه


دعوه

دعوه


دعوه

تعاطفك لوحده مش كفايه

اتبرع ولو بنقطه


بل ريقك بقزازه عصير جهينه


وامل جيبك ب 20 جنيه


سيبك من ده كله


ومن عند الله خير وابقا
دمتمت سالمين



هناك 6 تعليقات:

  1. ولا واحد علق

    تصدقى فعلا التفاهه ليها ناسها والاهميه ليها ناسها

    ردحذف
  2. اولا انا نفسى اسال عليكى من زمان
    وربنا يسهل وتكونى كويسه
    والمشكله انى مينفعش اسال فى مواضيع شخصيه كده وانا فى التعليقات فمش عارف بس اعمل ايه بس ما علينا
    ابقى طمنينا انك بس كويسه بعد التبرع لانى بعد ما اتبرعت اولا الابره كانت تخينه بغباء
    وجالى دوخه عشان انا رفيع اصلا
    وكده

    ردحذف
  3. بالنسبه للقضيه
    لما القاضى بتاعها يتقتل
    عشان القضيه دى
    تطلع براءه فى الاخر
    ابقى اغبى واحد فى البلد
    وانتى كذلك
    لا
    مش احنا بس
    كل المصريين اغبى من بعض
    دول كفار
    وربنا هيقتص منهم
    بلاش كفار
    خليها خونه

    ردحذف
  4. واخيرا
    بالنسبه للتبرع
    هحاول بس موعدش
    لانى رفيع وعندى انيميا باين
    ويوم ما اتبرعت كان هيغمى عليا
    فبفنكر اتبرع لما يبقى عندى صحه

    ردحذف
  5. وسيادتك وحشانى جدا
    صحيح
    مبتفكريش فى رحله لقريه فينيسيا السياحيه
    ههههههههههههههههههههههههههههههههههه

    يا رب تكونى كويسه
    انا كنت فى مصيف وشوفت موضوعك متاخر

    ردحذف
  6. حاجه تحير فعلا بس في حاجه كان شرحها عمي اطال الله عمره وهو بالمرة غير وطني خالص هو مصري خالص
    قال ان القاضي ده عمرة ما كان فرد واحد
    القاضي مجموعة اشخاص تعمل على فك طلاسم القضية واستنباط الحقائق من قلب الوقائع التى تقدم له من النيابه بعد ان تاتي من الشرطة

    ثم ان القاضي ملزم وكما قلتي واصبتي الدقة بمجموعة من الادلةوالبراهين ولو طلب المعاينه فهناك قسم مختص بالمعاينات وهم الخبراء

    ان لا انفي مسئولية القاضي بوصفه الحكم الاول والاخير ولكن ايضا للقاضي ان لم يرتاح الى الادلة ان يطرحها جانبا وده صعب عمليا لان كمية الادلة والاثباتات التى تقدم له ومدى قوتها يمكن ان يقيد القاضي وهو في النهاية مطالب بان يكون محايد لذا سيكون القاضي مجبر على الاخذ بما يقدم له طالما اثبتت التقارير والمستندات صحه طرف من الاطراف

    ردحذف

قول اللى فى نفسك وعبر عن نفسك