2009/06/19

هتلبس الكمامه ؟!!!


مع ظهور اول حاله لنفلونزاالخنازيرفى مصر والعالم كله فى وادى واحنا فى وادى تانى خااااااااااالص .ففى الوقت الذى ينشغل فيه دول العالم باكتشاف مصل للفيرس كان شاغل المصريين الشاغل هو الكمامه !


ويا ترى هتلبسها ولا لا ؟ وبينى وبينكم حاجه زى دى كانت لازم تشغلنا شويه لان الثقافه الوقائيه دى حاجه جديده علينا .


وانا رصدت لك اهتمام الشعب المصرى بالكمامه من جميع الاتجاهات فلا يخلو منتدى او جريده الا من الحديث عن رد فعل المصريين تجاه تلك القماشه .


فى مصر مازالت الناس مترددة حتى الآن، ومازال السؤال الأشهر يسيطر على الموقف: هتلبس الكمامة ولا لأ؟ طيب مش هتتكسف تلبسها، الناس هتضحك عليك فى الشارع، هيبقى شكلك نكتة وإنت لابس الكمامة، هذه نوعية الإجابات عن السؤال السابق، أما إذا قررت أن ترتدى الكمامة وتسير فى الشارع فهناك تعليقات من نوعية (إيه يا كابتن إنت كان نفسك تطلع دكتور، إيه يا فرفور، إنت أمريكانى يااد، شوفت الراجل اللى ماشى هناك ده، ماما ماما تقريبا الراجل ده أهبل، كابتن دى تفصيل ولا جاهزة، مش عيب القمر يدارى وشه، كابتن دى كمامة ولا قمامة).. وأعتقد أنك قادر على إضافة المزيد من التعليقات الساخرة لأن المصرى هيفضل مصرى النيل رواه وقلة الأدب معششة جواه، طبعا هذا لا يمنع أن تجد فريقا آخر من الشباب الروش الذى سيرتدى الكمامة لا خوفا من أنفلوانزا الخنازير وإنما على سبيل التغيير والهزار والفرفشة ولفت الأنظار. نقلا عن جريده اليوم السابع .




اما بقا لو كنت من زوار موقع اسلام اون لاين فسوف تجد الكثيرين ممن ينفذون تعاليم الدين الاسلامى باكمالها واصابهم القلق تجاه تلك القماشه فهذا شخص غيور على دينه ارسل سؤالا ما حكم ارتداء الكمامه اثناء الصلاه؟ فكان الرد من احد المشايخ انه حرام او لا يجوز لانها تلهيه عن الخشوع فى الصلاه ! فتقدم اخر طالبا من شركه صينيه ان تصنع لهم كمامات مطابقه للشريعه الاسلاميه ( بهزر طبعا).




اما ما اصابنى بالهلع وكدت اصيب بصدمه عصبيه هو ما جاء فى احد المنتديات الاسلاميه التى ربما اصاب اصحابها التهاب فكرى واحتقان فى معرفه تعاليم الدين الاسلامى السمحه فنقلا عن المنتدى جاء الاتى:


الحمد لله الذى ارانا الحق حقا ورزقنا اتباعه وارانا الباطل باطلا ورزقنا اجتنابه فمع ظهور الفيروسات المختلفه فى العالم ظهرت الكمامه التى تعد نصرا للمراه المسلمه المنتقبه التى تعرضت للاهانات بسبب ارتداء النقاب .............. والى اخره مما يربط النقاب بالكمامه بنصرت الدين الاسلامى وكأن الدين الاسلامى كان يحتاج الى هذه الكمامه حتى تنصره واعوذ بالله.


وهذه فنانه تشكيليه تعانى من فراغ قاتل فجاءت الكمامه لتسد فراغها واخدت ترسم عليها رسومات جميله لتجذب الناس الى شراء الكمامات وتشجع الناس على ارتداءها ( وهى سبوبه حلوه برضه).


اما الشىء الذى اصابنى بالقلق هو خبر قراته فى جريده اليوم نصه ان محلات العصير تعتبر من اكثر الاماكن نقلا للفيرس وبما انى دمى بيجرى فيه كرات حمرا وبيضاء وخضرا وسوداء ( قصب وتمر ) فكان لازم اقلق على مستقبلى المهدد ولكنى قبل ان اغرق فى نوبه قلق تذكرت براءه اختراع المصريين الكيس ابو شنيمو وبكده تمام التمام وبقترح عليهم يزودوا الكيس بكمامه برضه واهى تبقا حمايه من جميع النواحى.


قبل ما انهى طبعا لازم اجاوب على السؤال هتلبس الكمامه و لا لا ؟

اكيد طبعا مش هلبس مش علشان رفضى لثقافه الوقايه ولكن ايمانا بقول الرسول صلوات الله عليه الذى لا ياتيه الباطل من بين يديه ولا من خلفه فى الحديث الصحيح ( لا عدوى ).

فاذا كان الله قد قدر لى ان اصاب بالفيرس فانى سوف اصاب به ولو كنت فى بروج مشيده لان الله قد قدر هذا.


انت بقا هتلبس الكمامه؟

هناك 4 تعليقات:

  1. النيل رواه وقلة الادب معششه جواه
    ده خلاص نعتمده مثل شعبي ...

    قصة التريقة على كل حاجه دي فعلا مضيعانا ..

    تذكرت حملة القضاء على مليون مفتي في جروب القوصية اللى كان عاملها سايكو
    واللى رد عليه فيها الدكتور هيثم وقال حملة القضاء على 80 مليون مستفتي
    ما هو فعلا تخيلك بان حد هيبعت ياخد فتوة يلبس الكمامه ولا لا واردة قوي
    في الوقت اللى ما بيسألش فيه هو الانتخابات دي واجبه ولا لأ ...
    تنويه
    ===
    تعديل فوري ..لأ لأ .. فين الاخذ بالاسباب يا داياموند معقول انتى تقولي كده لو مكتوبلي هموت هموت ولو كنت في بروج مشيده .. طيب ده ماله ومال ان في مرض وفي طريقة وقايه معينه واجبة الاتباع .. ولا ايه ولا تلقوا بايديكم الى التهلكة متنفعش هنا
    زي ما هتقولي بروج مشيده هقولك ولا تلقوا بايديكم الى التهلكة ...
    دي هفوة منك اكيد راجعي نفسك وياريت تعملي التعديل وابقى احذفي ردي وانا هرجع اكتبه من تاني بدون التنويه
    ومكنتش احب انى ارحب برجوعك بنقد على طول كد
    ههههههههههههههههههههههه

    لكن مفيش مشاكل العملية في بيتها

    ردحذف
  2. السلام عليكم

    عودٌٌ أحمد بإذن الله ، واعتذارٌ لتأخري في الزيارة والتدوين.

    أنا لن أرتدي الكمامة في بلدي ، ليس إعراضاً أو لعدم اقتناع ، ولكن لأن الفيروس تقريبا غير موجود في بلدي ، معظم حامليه من القادمين من الخارج وخصوصاً الولايات المتحدة ، (واحنا طبعا زي مانتي عارفة بتوع الكويت ، الكويت وبس ، الكويت حنى الموت) ...

    أما لو قدر الله لي _لا تنسني من دعاءك_ عمرة في رمضان ، فسألبسها بلا شك.

    تحياتي ودعاءي.

    ردحذف
  3. سقراط

    اهلا بك على اى حاله معارضا كنت او موافق
    صدرت مؤخرا وبعد وفاه شاب عائدا من الاراضى المقدسه اثر اصابته بالفيروس فتوى بانه يعد منتحرا طبقا لقول الله تعالى ولا تلقوا بايديكم الى التهلكه واحسنوا ان الله يحب المحسنين
    وطبقا لنهى الرسول عن السفر الى البلاد المصابه بالطاعون
    والله اعلم

    ربنا يعافينا ويعافيك
    وشكرا على مرورك الكريم
    والسلام ختام

    ردحذف
  4. دكتور هيثم

    حمدلله على سلامتك وليس بين الخيرين حساب

    وبعدين حضرتك لحقت ترجع الكويت ؟

    ربنا يكرمك ان شاء الله ويوفقك الى ما يحب ويرضا
    ولا تنسانا ايضا من دعاءك

    وشكرا على مرورك ولك خالص تحياتى
    والسلام ختام

    ردحذف

قول اللى فى نفسك وعبر عن نفسك