2009/03/06

ال facebook وسنينه


اكيد اكيد اكيد لم يكن يعلم مارك جوكربيرج عندما جلس امام شاشه حاسبه الالي.. وهو طالب في جامعه هارفرد وبدأ بتصميم موقع الهدف منه ان يجمع تلاميذ جامعه هارفرد الامريكيه العريقه ..ليتبادلو صورهم وارآهم وكل مايتعلق بهم ان هذا الموقع سوف يصبح فى يوم من الايام ظاهره او فاشون ان صح التعبير وانه اصبح اكبر موقع للتعارف وتبادل الاراء بل وفرضها ايضا فى العالم وان اكثر من 70% من مستخدمى هذا الموقع سوف يكونوا مصريين وليس طلاب جامعه هارفرد الامريكيه فقط.
وبما ان المصريين دخلوا فى الموضوع فوسع بقا المصرى جاى يترك بصمته فلازم كل شىء يكون ليه مذاقه الخاص ده المصرى يابنى امال ايه احنا بنلعب حضرتك لالالالالا احنا جاينين الفيس بوك علشان نقول المصريين اهما حيويه وعزم و............؟ الله اعلم بالباقى
وبما انى واحده من 70% اللى بيستخدموا الفيس بوك او كنت بستخدمه فلازم اقول رايى فيه كعادتى محبش اسيب حاجه تعدى كده بدون ما افتح بقى حتى اقول بس بم واقفله تانى .

انتى رايحه فين خاليكى طيب هنهون عليكى طيب الناس دى هتوحشيهم خالص طيب هو حد زعلك طيب هو حد داسلك على طرف قولينا طيب ؟ طيب وضحى وجه نظرك يمكن نشوف حل بلاش ماتمشيش
ياجماعه معلش انا اسفه انا عادتى كده وعلى راى المثل يا بخت من زار وخفف وانا معاكم من خمس شهور او اكتر عايزين ايه تانى سيبونى اروح بيتى بقا
طيب هترجعى تانى احنا هنستناكى مش هنعمل رموف يمكن تغيرى رايك
طيب يالا سلام عليكم.

ايه ايه انا لسه هنا معاكم ياجماعه مرحتيش بعيد بس كنت بقولكم على اللى حصل وانا بلغى الاكونت بتاعى من على الفيس بوك ودلوقتى هقول راى بعد عشره طويله علشان مااعمليش زى المثل تعرف فلان اه اعرفه طيب عشرته لا تبقا ماتعرفوش لالالالا انا بقا عشرته واعرفه كويس وعايزه اقول راى فيه .
اولا فيه حاجات عجبتنى جدا واستفدت منها كتير ولا انكر هذا علشان ماعمليش زى القطط تاكل وتنكر وطبعا فيه حاجات ضيقتنى جدا .
انا هبدا بالجانب الغير مشرق علشان المشرق نخليه فى الاخر
اولا الغلاسه: هذا العنصر متوافر بكثره بين مستخدمى الفيس بوك على سبيل المثال شخص ما من اصدقاء صديق ليك مثلا شافك عند صديقك يروح يبعتلك دعوه انكم تبقوا اصدقاء وانت اصلا ماتعرفوش ولا هو يعرفك بس علشان انت صديق صديقه .
ثانيا الطفاسه: تلاقى الواحد من دول عنده اكتر من 1000 صديق طيب معلش سؤال انت تعرف كل الناس دى ولا بس حضرتك عندك بعد نظر علشان لو مستقبلا عملوا مسابقه اكبر مجمع للاصدقاء تكون انت! وبعدين ليه اصلا الواحد يضيف ناس ولا عمره عرفهم قبل كده فى حياته وبعدين يكونوا ليهم حق الصديق وانك تسال عليهم وتتكرم وتكتب على الووول بتاعهم انا الحمد لله لم اعانى منها لانى اصدقاء اللى كانوا على الفيس بوك تربطنى بهم لاما علاقه زماله او صداقه حقيقيه ولم يتعدوا 15 صديق.
ثالثا الفضول: وما ادراك ما الفضول كل واحد عايز يدخل على اللبومات الصور بتاعت صديقه وياريته يعلق بس لا ممكن تعجبه صوره ما فيهاش حاجه لو عملها دون لود عنده فضول قاتل ومتوافر بكثره بين معظم مستخدمين الفيس بوك.
رابعا النرجسيه: كل واحد شايف نفسه يروح يعمل ايه يعمل جروب على الفيس بوك ويجمع جيرانه وجيران جيرانه وعليا المشاريب يالا يعنى طياستى احسن منك ما طياستى كمان عايز يعمل جروب على الفيس بوك.
خامسا التفاهه: التفاهه وجدتها وبكثره على الفيس بوك فمثلا لاتتعجب اذا وجت جروب مثلا لمحبى تومى جيرى او مازنجر او كابتن ماجد او حتى كرومبو ولا تتعجب ايضا اذا وجت امثال عزيزه اللذيذه على الفيس توك. او رامى الاعتصامى راعى جروب تغير النشيد الوطنى!
سادسا الترويج للافكار تتنافا مع العقل البشرى والفطره الانسانيه وافكار مشوه لدين ومشتته للعقل وهلمه جراء من هذا القبيل من الافكار
وانت بقا عقلك فى راسك تعرف خلاصك!

واما الجانب المشرق والذى لاانكر وجوده وبكثره ايضا فهو يتمثل فى اكثر من جروب ولعل ابرزها حمله الدفاع عن سيد الخلق صلوات الله عليه
حمله يالا نشتغل الجروب ده جميل جدا فيه كورسات تنميه بشريه جميله واى حد ممكن ينزلها عنده.
لولا الفيس بوك ما كنا نعلم شىء عن اسراء عبد الفتاح واحمد ماهر
لولا الفيس بوك ما كنت قرات كتب جميله للكتاب المفضلين لدى امثال محمود السعدنى وغيره.
لو لا الفيس بوك ما كنت احلم فى يوم من الايام ان اكون فى اتصال مباشر مع دكتور زغلول النجار .
لولا الفيس بوك .................................. اكيد استفدت منه كتير بس كان لازم اقول ستووووووب ويا بخت من زار وخفف.
لولا الفيس بوك ما كنت جيت وكتبت البوست ده
من الاخر الفيس بوك سلاح ذو حدين شوف انت بقا ناوى تمسك السلاح ازاى .

هناك 9 تعليقات:

  1. السلام عليكم
    دى زيارتى الاولى
    وعجبنى اوى الموضوع الفيس بوك انا وخداه كموضوع ترفيهى بحت واعرف اخبار اصحابى المقربين منه
    الباقيين ما فيش مشاكل لانك ممكن تجعلى علاقتك بيهم مجرد اضافه واستفاده من موضوعات بيكتبوها
    واللى ما يعجبك الغيه من القائمه ودا بعمله
    انا شايفه الميزه الوحيده فى الفيس بوك هى الجروبات الدينيه اللى بتبعتللك قصص عن الصحابه او مواقف ما كنت اعرفها عنهم وعن الدين بصفه عامه
    والجروبات السياسيه فيها معلومات ممتازه
    انا استفدت منها جدا الصراحه
    الباقى اى كلام طبعا
    بس هو وسيله زيه زى الميل تقدرى تتحكمى فيها
    بالنسبه للصور طبيعى الصور اللى تخافى ان اى حد ينقلها ما يجب ان تحطيها اصلا حتى لو صور لشئ عادى

    دى طبعا وجهات نظر وانا مش بعيد الغى حسابى بردوا منه
    بس دا هيكون للانشغال اكتر من اى شئ تانى

    دمتى بكل الخير

    ردحذف
  2. الفيس بوك مكان جيد للتعارف فقط ، ولكننا (المصريين) دائماً ما نبحث عما حرمنا منه ، فنستغل أي مساحةٍ حرة في الحديث عما يبدو في أذهاننا محرماً الحديث عنه كالسياسة والدين والجنس ، فيفقد الموقع قيمته لاستغلاله فيما لم يُنشأ من أجله ، ويفقد الموضوع أهميته لطرحه في غير موقعه.

    الغلاسة والطفاسة والفضول والنرجسية والتفاهة والترويج لأفكارٍ هدامة ، جميعها أوجه أخرى لعملات قيمة ، ذلك شأن كل ما هو حر ، وأذكرك بالصحافة الحرة التي جلبت إلينا أفكاراً وأخباراً بجميع الألوان من الأصفر إلى الأسود ، ولكن في النهاية لا يصح إلا الصحيح ، كذلك الإنترنت بصفة عامة ، والفضائيات ، فما بالك بصفحة على الشبكة يتاح لكل من هب ودب أن يضيف إليها بلا كارنية نقابة أو شهادة خبرة أو تصريح مزاولة مهنة ، في الدين فقيه يتحدث ، وفي الرياضة بطل أوليمبي ، وفي السياسة زعيم مفدى ، وفي كل مجال هو قمته ..... بالطبع هناك مثالب ، لكنها لا تنفي أبداً أنا في حاجةٍ للحرية إنما تؤكد حاجتنا الأكثر إلحاحاً لاحترام تلك الحرية وتحمل أمانتها.

    ع الهامش
    ---------
    من غير زعل ، أخطأتي كثيراً في ترك جروب الفيس بوك ، لأسباب كثيرة :
    1-أن الجروب يحمل اسم بلدك ، ومن أسسوه وأنت منهم تعاملوا معه بصفته خدمة لبلد ، لا رفعة لأشخاص ، لذا فانسحابك منه تخاذل عن خدمة بلدك.
    2-وجودك في الجروب كان حيوياً بالشكل الذي جعل غيابك عنه كغلقه بالشمع الأحمر ، كان من الممكن الانتظار قليلاً حتى يكتمل بناؤه ثم انسحبي كما تشاءين
    3-وجودك في الجروب كان من الأهمية أن شجع فتيات أخر للاشتراك والتواجد دون رهبة أو سلبية ، وخروجك منه منسحبةً ربما يؤدي لنتيجة عكسية إن لم يكن حدث بالفعل.
    4-شخصياً أعاني مسألة فتور الهمة وضعف العزيمة ولا أحب أن أرى غيري مثلي في ذلك ، بل إني لما شاركت كان هدفي فقط الاشتراك (أعني التسجيل) ، ولم يكن هدفي التفاعل ، وعلو الهمة ما لمست فيكم جميعاً هو ما دعاني للمشاركة بإيجابية أكثر ، كذا انحسار الهمة لديك وغيرك دفعني دفعاً للانسحاب وبسرعة.

    -----------------
    دائماً أتمنى لك التوفيق ، ودعاء ملئ بالخير.

    ردحذف
  3. غير معرف8/3/09 11:18

    انا قلت رايي قبل كده بس فى حاجهةناقصه
    ربنا سبحانه وتعالى فى سورة ابراهيم قال"ألم تر إلى الذين بدلوا نعمة الله كفرا وأحلوا قومهم دار البوار " سورة ابراهيم الايه 28
    فى هذه الآية يلوم الله على تبديل النعمة التى انعم بها على الناس فى استخدامها الخاطئ , فجعل لهم عقاب " جهنم يصلونها وبئس المصير
    واعتقد ان هذا عقابهم فى الأخرة ، اما ما فى الدنيا هو ان الله جعل اناس خيريين لكى يستغلوا نعمة الله بالطريقة الصحيحة ويحاولوا ان لا يجعلوا مساحة للاستخدام السئ .
    وشكرا

    ردحذف
  4. رايك يحترم مفيش كلام
    بس انا وجهة نظري من وجهة نظر الدكتور هيثم
    في اسباب كتير خلت المصريين كده على الفيس بوك

    وان كنت شايف انك كان المفروض تبقى من المستخدمين المصريين اللى انتى بتتطلعي ليهم مستخدم غير فضولي ومش غلس ومش رخم ومش تافهه ...الخ من صفات المستخدمين المصريين التى دفعتك لكتابه هذا البوست

    ع الهامش
    اسف لانشغالى عن متابعة تدويناتك ولكني اعدك باني ساقرا ما فاتني

    ردحذف
  5. السلام عليكم
    بسنت

    اولا اهلا بيكى نورتينى ثانيا رايك جميل جدا ومعكى حق فى جميع ما قلتى وشوفى ايه اللى ممكن تستفادى منه وخديه وما يضرك اتركيه

    اهلا بيكى مره تانيه
    والسلام ختام

    ردحذف
  6. دكتور هيثم

    اذا علمت الوجه الاخر ما لمتنى ان تركت الجروب
    واسمحلى حضرتك اذكرك انى كنت سبق وتركته ولكن عدت اليه مره ثانيه .
    واكملت معهم الى ان اصبح الجروب به اعضاء كثيره والى هنا انتهت رسالتى معهم ولكنى اتابعهم من بعيد ولا ابخل عليهم بافكارى

    طبعا مفيش زعل من حضرتك ولا حاجه

    وشكرا على مرورك الكريم

    ردحذف
  7. الباردوى اهلا وسهلا بيك فى مدونتك طبعا فكم كنت ضيفا ثقيله على تيار بديل واجلبت لهم الكثير من المشاكل.
    لا اعلم لماذا تذكرت الفريد نوبل بكلامك هذا ولكن هذا حقا حال البشر تبديل نعمه الخالق


    شكرا على مرورك الكريم واهلا بك
    والسلام ختام

    ردحذف
  8. سقراط

    حمدلله على السلامه
    وبعدين مفيش اسف ولا حاجه الدنيا مشاغل
    وانا مستنيه تعليقك على ما سبق

    وشكرا على مرورك
    والسلام ختام

    ردحذف
  9. البارودى انا اقصد نفسى طبعا
    اللى كنت ضيفه ثقيله

    واسفه على الخطاء الاملائى
    ولكن تعلم جيدا ان لغتى العربيه تحدثا وكتابه فى الضياع
    هههههههههههههه
    اسفه مره اخرى

    ردحذف

قول اللى فى نفسك وعبر عن نفسك