2009/03/20

زملكاوى بجد




ما ينفعش اليوم ده يعدى كده بدون ما اجىء وادون الحدث السعيد ده ان ما كنش علشانى فعلشان والدى العزيز الزملكاوى الاصيل


مش عارفه اذا كان حد فيكم قرا الحوار اللى دار بينى وبينه قبل كده ولا لا؟


واللى اقنعنى فيه بان معظم جمهور الزمالك بيشجع فريقه طبقا للمقوله اللى بتقول مصائب قوم عند قوم فوائد


واللى طلبت منه وقتها ان يوضح لى يقصد ايه بالموضع ده فقالى بمعنى ان اى هزيمه للاهلى تعتبر مكسب ليهم واى حد عدو الاهلى يبقا حبيبهم واعز الاصدقاء.


الحوار ده انا كنت عملاه مع والدى علشان اقنعه انه يغير ويشجع فريق غيره حتى ولو بيترول اسيوط المهم يغير الزمالك ده اللى امال يخسر حتى من اضعف الفرق وهو طبعا رفض تماما وقالى ماتحوليش.


المهم سبحان من يغير ولا يتغير الزمالك يابشر واخيرا وبعد غياب طويل بقى بيفوز وبيدخل اجوان كمان تتخيلوا


سبحان الله زمن العجايب .


لما الزمالك فاز 1/0 انا قولت ده ظرف طارق وهيعدى وهترجع ريمه لعوايدها القديمه وكنت مش بعلق بكتفى بس انا اقول لبابا مبروك ولسان حالى اقوله ما تفرحش قوى كده يابابا وتوزع فلوس للعيال ولاد عمى وانا واخويا من ضمن مسيره يرجع ويتهزم تانى .


ويجىء الزمالك ويخيب ظنى تماما ويفوز 4/2 معقول ده الزمالك فعلا سبحان الله .


النهارده بقا ياجماعه الموافق 20/3/2009 يفوز الزمالك على نادى الاولمبيى 2/1 .


انتوا متخيلين انا الصراحه ما حضرتيش المطش للاخر لانى فقدت الامل تماما انه ممكن يفوز بس تحصل المعجزه ويدخل شيكابالا جون وبعدين جون تانى .


كان لازم اروح لبابا المره دى بقلب جامد واقوله مبروووووووووووووووووووك ياحج مبروك يازملكاوى يااصيل .


واساله عن سر التغير الرهيب ده اللى حصل للزمالك ازاى بقى كده بيدخل اجوان ويفوز كمان والله الواحد خايف يتعود على كده .


شوفوا بقا واعرفوا سر التغير الرهيب من وجه نظر زملكاوى اصيل .


هو ايه يا بابا التغير الرهيب ده والله انا خايفه احسده


يابنتى ده الزمالك طول عمره كده بيحب يبسط جمهوره .


بس ما قولتليش يا بابا ايه سر التغير ده؟


اصلى انتى مش واخده بالك جمهور الزمالك عمل ايه.


ها عمل ايه ؟


اخر مباراه اتغلب فيها الزمالك جمهور الزمالك كان بيهتف ويقول


بالروح والدم نفديك يا زمالك بالروح والدم نفديك يافرقنا.


ها علشان كده الزمالك حب يبسط جمهوره ويغير من نفسه؟


لا مش كده بالظبط .


امال ايه اللى بالظبط؟


اللى بظبط ان اللعيبه خافوا من الجمهور لما الجمهور يشتم ويقول شويه لعيبه زبال.......


مش مشكله لكن لما يقول بالروح والدم دى اكبر مشكله لان تاريخ الهتاف بالمقوله دى بيكون فى بلدنا بتكون نتائجها غير محموده فهما حبوا يشتروا نفسهم ويشتروا ارواح جمهورهم


هههههههههههههههههههههه فهمت ياحج فى الجووووووووووون دى كمان


طول عمرك فايز عليا


مبروك مره تانى


مش لوالدى بس لكل الزملكاويه

هناك 7 تعليقات:

  1. يا حرام ....
    *أنا بقول يعملوا يوم كل سنة لجمهور الزمالك يحتفلوا فيه بأمجادهم البائدة ويبكوا فيه على أطلال عشر سنين بطولات (الثمانينات)، ومن الأفضل يكون أول جمعة في أبريل ويسموه "يوم الزملكاوي اليتيم"

    *قال لي صديقي الزملكاوي يوماً : "احنا الزمالكوية أصل الشعب المصري ، وانتوا الأهلوية زي المستعمرين."
    في الواقع لم أفطن لصحة مقالته سواءً كان يعنيها أم لا إلا بعد أن تدبرت فصدقت ، فالزملكاوي دائماً ما يتحدث عن الماضي ويهرب من واقعه المخزي والمصري دائماً ما يتحدث عن الحضارة ويغفل عن حاضره المتخلف ، والزملكاوي دائماً ما يشكك في فوز الأهلي ويبحث عن مبررات لهزائم فريقه مثلما يشكك المصري في نجاح الآخرين ويختلق مبررات وشماعات لفشله ، الزملكاوي بيحب فريقه بالكلام بس (مش هيتنازل عنه لكن مش هيقدم له حاجه برضه) كذلك المصري يحب بلده فقط بالأغاني والأشعار ، وأخيراً الزملكاوي هيفضل زملكاوي زي ما المصري هيفضل مصري.

    *قال لي نفس الصديق الزملكاوي يوماً " ابقى افتكر إن الأيام دول ، وتلك الأيام نداولها بين الناس"
    طبعاً كان يقصد أن الزمالك سيعود ليفوز ببطولةٍ أو أربع على أقصى تقدير كل عشرة أعوام ، لكنه في الواقع لفت نظري إلى أمرٍ آخر دون قصدٍ منه ، لفت نظري إلى أنه من الممكن أن يأتي يومٌ يختفي فيه مشجعي الزمالك نهائياً ، وذلك لسوء البنية الإدارية في النادي وتدهور نتائج فريق الكرة يوماً بعد يوم ، ومن الملاحظ فعلاً ندرة انتماء الأطفال الصغار للفانلة البيضاء(كان في وقت أولياء الأمور الزملكاوية بيجبروا أولادهم إنهم يبقوا زيهم لكن دلوقت مع سوء النتايج صعب إن ولي أمر ينصح ابنه انه يبقى زملكاوي مكسور العين زيه) ، الكلام ده مش هزار ده ممكن يحصل فعلاً لأن نادي الترسانة كان زي الزمالك من أكتر من تلاتين سنة ، ودلوقت مفيش حد بيشجع الترسانة في مصر غير حسن فريد رئيس النادي.

    *"وأما بنعمة ربك فحدث"
    اللهم إني أحمدك حمداً كثيراً طيباً مباركاً فيه على نعمة الانتماء للنادي الأهلي.

    *طبعاً مبروك للوالد ، وكل الاعتراض على الصورة السريالية الخيالية اللي حضرتك اخترتيها.

    ردحذف
  2. دكتور هيثم

    "احنا الزمالكوية أصل الشعب المصري ، وانتوا الأهلوية زي المستعمرين."

    تقريبا والله اعلم كل الزمالكويه بيرددوا نفس المقوله لانى سمعتها من والدى برضه.

    كان في وقت أولياء الأمور الزملكاوية بيجبروا أولادهم إنهم يبقوا زيهم لكن دلوقت مع سوء النتايج صعب

    ههههههههههههههههه وفى اولياء امور بتشترى اولادها وتشجعيهم بالفلوس
    وده حالى مع بابا لما يكون فى مطش للزمالك اقعد جنبه اصبره ولما يفوز اخد الحلاوه ههههههه
    وكذلك الحال مع عمى الاهلاوى حتى النخاع بس اكيد الثروه اللى بجمعها من وراء عمى اكتر من ابى ههههههه
    يعنى تقدر تقول ممشيه حالى فى كل الاحوال

    *"وأما بنعمة ربك فحدث
    احمدك يارب حمدا كثيرا مباركا فيه لانى شيبساويه ومصريه.

    طبعاً مبروك للوالد ، وكل الاعتراض على الصورة السريالية الخيالية اللي حضرتك اخترتيها

    الله يبارك فيك يادكتور
    وعلى الصوره والله انا كنت هكتب اعتذار بس نسيت
    على العموم انا اسفه
    وهغيرها

    شكرا على مرورك
    والسلام ختام

    ردحذف
  3. دكتور هيثم

    انا اضفت صوره تانى
    وكده نبقا رضينا الطرفين
    الاهلويه والزمالكويه

    بصوره سرياليه حياليه

    ردحذف
  4. " واللى طلبت منه وقتها ان يوضح لى يقصد ايه بالموضع ده فقالى بمعنى ان اى هزيمه للاهلى تعتبر مكسب ليهم واى حد عدو الاهلى يبقا حبيبهم واعز الاصدقاء"

    صدقيني والدك زملكاوي فعلا لان التعريف الصحيح او المتفق عليه بين خبراء الرياضه انه ذلك الشخص الذي يكره كل ما هو احمر اكثر من حبه لكل ما هو ابيض
    ههههههههههههههههههههههههههههههههههههههههههه

    "احنا الزمالكوية أصل الشعب المصري ، وانتوا الأهلوية زي المستعمرين."

    قوليله ان النادي الاهلي كان اسمه نادي طلبه المدارس العليا وان اللى اسسه هو سعد زغلول وعلم الاهلي قبل ما يتغير كان علم مصر وفيه شعار الاهلي
    وانه نادي اسس للعمل الوطني اما نادي فاروق او المختلط ( الزمالك حاليا ) كان نادي للطبقه الارستقراطية والاجانبي المقيمين في مصر ....اطن كفايه كده

    وبعدين ايه اللى مخليكي فرحانه قوي اتقلي انتى كنتى ماشيه تمام هما يومين وهتلاقي الهزايم تاني ما تستعجليش ههههههههههههههههه بجد زي ما بقولك وموعدنا ماتش الاهلى

    احب اقلك لتاني مره انك اصبتي في اختيار عنوان تدوينتك " زملكاوي بجد "

    على فكرة الاهلوية فعلا نفسهم الزمالك يرجع تاني زي زمان ونفسهم تبقى في منافسه عشان زهقنا من انبي وبتروجيت وحرس الحدود نفسنا في الزمالك بجد عشان ندمره ويتدهور حاله وهكذا

    ردحذف
  5. سقراط
    عجبنى جدا تعريف الزمالك وهقوله لبابا

    وبعدين ايه اللى مخليكي فرحانه قوي اتقلي انتى كنتى ماشيه تمام ه

    هههههههههههههههههههه انا عارفه بس قولت مش عالطول اقول لبابا ما تفرحش قوى قولت ارفع من روحه المعنويه وافرح معاه


    على فكرة الاهلوية فعلا نفسهم الزمالك يرجع تاني زي زمان ونفسهم تبقى في منافسه عشان زهقنا من انبي وبتروجيت وحرس الحدود نفسنا في الزمالك بجد عشان ندمره ويتدهور حاله وهكذا


    امنيه نفسى تتحقق علشان اخد فلوس كتير لما الزمالك بقوز من بابا وكمان لما الاهلى يفوز علشان اخد من عمى
    هههههههههههههههههههههههههه
    مصلحه

    شكرا على مرورك لك خالص تحياتى
    والسلام ختام

    ردحذف
  6. بوست دمه خفيف
    بس عايزة اقولك مفيش فايدة
    الاهلي عمهم و حابس دمهم
    ههههههه
    خالص مودتي و تحياتي

    ردحذف
  7. كلبوزه لكن سمباتيك!
    نورتينى اولا
    ثانيا اذا كان الاهلى عمهم وحابس دمهم
    فالزمالك هندسه لعب وفن ومدرسه
    هههههههههههههههههههههههههه

    نورتينى مره تانيه وشكرا على مرورك
    ولك خالص تحياتى
    والسلام ختام

    ردحذف

قول اللى فى نفسك وعبر عن نفسك