2011/02/09

قول هندى ايه لمصر ؟؟؟


ما تقولش ايه اديتنا مصر قول هندى ايه لمصر


فاكرين طبعا كلنا الكلمه دى كنا دايما بنقولها واحنا بنتريق على حال البلد وحالنا معاها وكنا دايما بنرد برضه على السؤال بالاجابه المعتاده هى مصر كانت اديتنا حاجه لما انا هديلها ؟ الكلام ده كان قبل 25 يناير وبما ان العالم كله اقر واعترف ان مصر قبل 25 يناير غير مصر تماما بعد 25 يناير فلازم كلنا نفكر بجد فى السؤال ده والاجابه ليه لازم تكون مش اقل ابدا من انجازات ثوره 25 يناير ومش اقل ابدا من شبابها العظيم فاذا كنت تسأل عظيما فثق بالاجابات العظيمه سوف تكون فى انتظارك .


فبعد ان خلع الشعب المصرى جلاده واجبره على الاعتراف بعدم شرعيته فى كونه رئيسا للبلاد وهذا قوله بلسانه فى حوار تم بثه فى عام 2005 وفى الجزء الذى تعيده علينا قناه العربيه ليلا ومساءا وكانه تذكره لعل الزمن يكون انساه ما قاله فلتكون كلماته تذكره له بانه قال الشعب وحده هو من يختار بقاء رئيسه او رحيله وقد قال الشعب كلمته ( ارحل يا ظالم ) فاصبحنا بلا رئيس فقط الشعب هو رئيس نفسه

بس يا ترى كل واحد فكر هيكون دوره ايه فى المرحله اللى جايه ؟؟؟



للاسف الاحداث الاخيره اصابت الكثير من اقتصادنا المصرى فاصبح الجنيه المصرى يحارب من اجل البقاء فى الوقت الذى يسعى فيه افراد الشعب الى سحب ودائعهم من البنوك خوفا من فقدانها وهذا غير صحيح بالمره فهنا لازم يكون دورنا اننا نحافظ على الودائع فى البنوك ولا نسحب منها الا ما نحتاج اليه فقط حتى نستطيع ان ننهض مره اخرى


وكذلك مستشفى سرطان الاطفال اللى هى اصلا اتبنت بفلوس الشعب اللى هى ملكنا اصابها التخريب برضه دورنا اننا نحاول نعيد ما اتلفته الايادى الحاقده ونحاول نتبرع للمستشفى باقل القليل وكله فى ميزان حسانتك وبرضه علشانك يا مصر

حساب المستشفى ببنك الاسكندريه /101057357001


البورصه المصريه : لا احد يستطيع ان ينكر الخسائر التى لحقت بالبورصه المصريه خلال فتره الاحداث وما نخشاه فى الفتره القادمه اكثر

ولكن ممكن دورنا احنا كشباب يكون قوى فى النهوض مره اخرى بالبورصه

دور فى جيبك كده ممكن تلاقى 100 جنيه روح اشترى بيها اى اسهم واستثمر فيها ال100 دى وما تنتظرش هتعود عليك بايه غير انك بكده ساهمت فى محاوله النهوض بالبورصه مره اخرى .


بنك الطعام المصرى: اللى مهتم بالاقتصاد المصرى والاحتياطى فى المواد الغذائيه الاساسيه فى مصر هيكتشف وللاسف ان مخزون القمح اللى عندنا يكفى فقط 3شهور اذا استمرت حالت البلد بهذا الشكل وكذلك مخزون الارز والسكر يكفى ل2 شهور فقط وطبعا لو لم نقف معا لواجهت مصر ازمه وربما مجاعه لسمح الله ولكن ممكن نعمل حاجه بسيطه جدا وهى انك تتبرع باى حاجه فوق احتياجك لبنك الطعام المصرى واللى متبنى حمله جميله جدا تحت شعار ( علشانك يا مصر )

ممكن حضرتك تتبرع لبنك الطعام عن طريق بنك الاسكندريه حساب رقم / 101099455001


مؤسسه مصر الخير وبنك الاسكندريه :

مش عارفه اذا كان معظمنا سمع عن مؤسسه مصر الخير ولا لا ويعرف دورها فى المجتمع ولا لا

عموما للى ما يعرفش مصر الخير فدى مؤسسه بتهتم بمجالات كتير فى حياتنا منها مجال التكافؤ الاجتماعى والتعليم والبحث العلمى والصحه ومجالات تانيه كتير لو عايز تعرف اكتر ممكن تدخل على موقع المؤسسه

المهم بنك الاسكندريه من ضمن منتجاته صندوق استثمار تحت اسم صناديق الخير صناديق الخير ده عباره عن وثائق سعر الوثيقه الوحده 10 جنيه اقل كميه للاكتتاب فيه هو 10 م يعادل 100 جنيه الصندوق ده بيدى عائد دورى كل ثلاثه شهور ممكن حضرتك تأخد العائد ده وتضيفه لحسابك وممكن تتبرع بيه لمؤسسه مصر الخير اللى بدورها بتنمى حاجات كتير فى المجتمع مع الحفاظ بقيمه الوثائق لصالح المؤسسه طبعا يعنى بتستثمر فى الخير


يعنى حاجات بسيطه ممكن تخدم بيها كتير فى بلدك وممكن تنهض بيها ببلدك اقتصاديا واجتماعيا هتكون راقى فى فكرك وراقى فى حياتك

وتكون ساعدت كتير .


انا بعرضى ده مش بفرض عليك تعمل ايه ولكن يمكن بدلك على حاجات واماكن تكون محتجالك لان مصرنا محتجالنا


برضه لسه ما جاوبتش

هندى ايه لمصر ؟؟؟

هناك 12 تعليقًا:

  1. illusionist9/2/11 15:44

    غالبا قلبى دليلى

    هههههههههههههههههههههه

    بقالى كام يوم مش بخش بس قولت اخش البلوج اشوفك كتبتى حاجه ولا لا

    لقيت منذ ساعه واحده

    الدنيا صغنونه

    ردحذف
  2. وكمان بدور عليك فينك انا افتكرت انك استشهدت فى الثوره

    اخبارك ايه ؟

    ردحذف
  3. illusionist9/2/11 15:56

    يا خبر اسود

    تصدقى السؤال ده فعلا اللى اجابته هتختلف ملايين الدرجات

    قبل خمسه وعشرين يناير

    انا كنت مستعد اقول ان السؤال ده غرضه الاساسى التريقه والسخريه وطبعا كان المعنى الف فى الميه صح

    دلوقتى وبكل امانه

    انا اقول انى لو مت فى سبيل البلد

    والله العظيم يبقى اقل حاجه اقدر اقدمها

    والله كمان مره لو والدتى عندها قناعه وايمان بالله قوى هى وابويا وسابونى اروح التحرير يوم الجمعه وانزل المظاهرات هطلع فى اول صف او تانى صف

    ومستعد اخد اى طوب ويتداس عليا واموت

    لو ده هيحفز الناس ويخلى مصر فعلا تبقى زى ما المصريين عاوزين الواحد مستعد

    الواحد اتغير اتغير قوى كمان

    الواحد مش خايف انو يموت

    والله نفسى اروح وخايف جوايا من انى اول مره اشوف مظاهرات بالحجم ده زى اى شاب

    بس فيها ايه لما اموت يعنى

    الامثله طلعت بجد

    امثله عاش ابد الدهر بين الحفر

    الموت جبان والكلام ده

    والله الواحد من كتر اللى شافه حاسس انو عاجز

    الواحد نفسه يعمل حاجه للبلد ومش عارف

    المناقشه كتيره قوى

    والواحد بيعرف يقول كلام حلو قوى

    بس نفسى اعمل مش اقول

    نفسى اروح موقع الحدث

    والله الواحد ما بقى جواه عاوز يتصور ولا الكلام اللى بيعملوه ده
    عاوز اروح استشهد

    حتى لو انا صغير معرفش يعنى ايه شهاده ومش عارف شعورى لما اموت والكلام ده

    وهو يعنى الواحد هيجرب الموت

    والواحد يطول يموت شهيد

    انا عاوز استشهد وسط ناس معرفهاش فى جنب لوحدى بس ابقى استشهدت عشان مصر

    عشان ابقى مت لهدف

    فعلا مظنش ان حد ممكن يعمل كده عشان بلده غير العربى اللى عنده وطنيه وخصوصا المصريين

    انا غالبا كتبت بوست

    عندنا فى البيت محدش هيعمل حاجه من اللى قولتيه فوق

    ولا تبرع ولا شرا ولا اى حاجه من ده

    وبالنسبه ليا ممكن انزل المظاهرات اللى فى شبين

    انما التحرير محرم عليا

    عارفه ليه

    عشان ابويا قالى انت مجنون وعاوز تروح مترجعش

    مكدبتش عليه وقولتله اه

    عاوز اقف فى اول صف

    هو مقتنع انى نفسى اهيص وازيط

    يمكن فيا جزء صغنون شبابى عاوز يعمل كده

    بس البقاى مش عارف اقنعه بيه

    وهو ساحب موبايلى ومبيخرجنيش من البيت عشان عرف انى هسافر من غير ما اقوله

    عندنا كمجرمين هربانين والسجون اللى الناس هربت منها ونزلتلنا منها عادى

    كلوا عادى

    مظاهرات وطلقات مطاط وقنابل

    هبل برضوا

    الفكره فى الناس اللى فى التحرير

    عاوزين نروحلهم

    عاوز اموت كشخص مصرى مش كشخص منوفى

    بس هما لسه مؤمنين بمبدأ انت شاب ومستقبل وهجايص من دى

    وانا قولتلهم لو ربنا كاتبلى انى ارجع سليم هذاكر واعمل مستقبل بس مستقبل ابقى شاركت فيه مش مستقبل اتفرجت عليه وهو بييجى

    حتى لو شاركت فيه بالهتاف

    بس مفيش استماع خالص

    كان نفسى اتكلم معاكى فى الموضوع ده والله

    بس انا خلاص مقتنع بشئ ومتأكد منو

    واللى محيرنى دلوقتى

    اروح من وراهم

    ولا لا ؟

    ردحذف
  4. illusionist9/2/11 15:59

    لا لسه مستشهدتش

    ده انا بتحايل عليهم وببوس رجليهم وايديهم مش راضيين

    تفتكرى فى حل؟

    ردحذف
  5. فاكر يا محمد انا وانت فى يوم من الايام كنا خلاص جبنا اخرنا من البلد دى فاكر البوست اللى كنت كاتبه بتلعن الشعب كله
    فاكر محمد فولتا البوست بتاعه بتاعه اللى كان من كلم واحده

    فاكر

    احنا اتغيرنا بقى فيه حاله فريده عمرنا ما هنحس بيها تانى
    فى حاله حب وحاله تفاءل وحاله وحده وطنيه بجد

    ايه ينفع لسه الوقت بدرى
    كله دلوقتى متاح
    لان القوه فى ايدك

    نورتنىيا باشا فينك من زمان يا زناتى بك

    ردحذف
  6. illusionist9/2/11 16:07

    والله انا بزورك هنا دايما

    بس مبسيبش تعليق يعنى على حاجه مش هقول فيها تعليق مفيد غير انى هسال عليكى

    وغالبا يعنى

    لما بتنزلى بوست يبقى انتى كويسه وبخير

    وده كويس

    ولا ايه ؟

    ردحذف
  7. جزاكى الله كل الخير يا حبيبتى ربنا يبارك فيكى ولاذم كلنا نكون ايد وحدة لنعمر مصرنا الحبيبه

    ردحذف
  8. أذكر كان اسمها أماني

    بمدونة الوعد الحق

    وكانت دائمة الحضور

    أين ذهبت لا أعلم

    عساها بكل الخير

    ردحذف
  9. ازيك يا امانى اخبار الدنيا ايه ؟
    جيت اطمن :)

    ردحذف
  10. ايه الاخبارات

    مش فاهم ليه وامتى وفين وايه

    دفتر حضورك فاضى نهائى

    مفيش كلمه ولا علامه صح قدام يوم حضور

    يا ريت لو تدخلى تكتبى اى حاجه

    اى حاجه فى اى اتجاه

    لو سمحتى


    اللنك ده ليكى

    http://www.mediafire.com/?a9n5jur13pp7f

    حملى اول فيديو خالص

    The arrivals

    ولينا لقاء تانى لو حضرتك فكرتى تكتبى

    ردحذف
  11. انا هنا ولو سمحتى لو ثقريتى التعليق ده حالا ادينى اى عقاد نافع الله يكرمك

    ردحذف
  12. غير معرف7/5/11 09:26

    ثقافة الهزيمة .. العتبة الخضراء

    و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

    و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

    ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

    باقى المقال ضمن مقالات ثقافة الهزيمة بالرابط التالى www.ouregypt.us

    ردحذف

قول اللى فى نفسك وعبر عن نفسك