دعايات وادعاءات

كدت ان القاء حتفى مرتين تحت عجلات توك توك

محدش يستغرب ولا ياخد الموضوع بتريقه على راى اخويا ويقولى انتى مقامك bmw مش توك توك
على الاقل علشان تكون حسن خاتمه بجد اما توك توك فاكيد اكيد دى سوء خاتمه واعوذ بالله

بس ارجع واقول انا اللى بجيب التريقه دى كلها لنفسى
ما انا لو امشى فى الشارع واحط وشى فى وسط راسى مش ارفعه لفوق ولا كان توك توك ولا حتى فيات هتقرب منى ولكن انا بمشى فعلا وانا رافعه راسى لفوق

اوعا برضه حديتريق عليا ويقولى خلاص يا ستى عرفناكى انك مصريه وقلتيها باعلى صوت فامش لازم ترفعى راسك لفوك كمان وانتى ماشيه
ارجع برضه وارد عليكم واقولكم والله ما هو ده السبب اللى بيخلينى ارفع راسى لفوق وانا ماشيه
امال ايه بس حيرتى الناس معاكى ؟
اقولكم عجب العجاب اللى بشوفه الايام دى فى الشوارع
واللى هو اليفط بتاعت المرشحين لمجلس الشعب والشورى واللى بكون ماسكه نفسى من الضحك وانا بقراءها واللى كمان بقراءها باهتمام بالغ
وده اللى كان هايخلى توكتوك اكتر من مره يموتنى تماما لولا ستر ربنا
المهم تعالوا بقا افرجكم على االادعاءات اللى بيستخدمها المرشحين لجذب الناس اليهم
عندك مثلا احد المرشحين تقمص دور مطرب او فنان مشهور التقت بيه مذيعه برنامج على النصيه وهاتك يا اهداءات فى حب واعتزازت
وبالحب بداءنا وبالحب نستمر وبالحب الله اعلم ايه اللى هيحصل ولسان حال المرشح يقول فى الاخر مع حبى واعتزازى ( هانى شاكر )
اما اخر فتقمص دور مفيد فوزى وهاتك سلامات عن الصحه والحال وازاى الصحه ازاى الحال طبعا حلوه وعال العال
واخر انعم الله عليه بالمال الوفير فانعم بماله على اصحاب محلات القماش والدهانات فقام بتعليق يفط تكفى لستر امه كاد العراء الفكرى ان بفسد حياءها

ده كله ده تمام ودايما ببص ليه وبقراءه وبسمه التريقه لا تختفى معالهما عن وجهى
اما اللى بجد بيخلينى ارسم ثمانيه وثامنون ( تعبير على غضبى ) على وجهى هو المرشح اللى بيستخدم ايات من القران فى الدعايه لنفسه
مثلا خد عنك
احد المرشحين كتب على احدى يفطه ( فَأَمَّا الزَّبَدُ فَيَذْهَبُ جُفَاء وَأَمَّا مَا يَنفَعُ النَّاسَ فَيَمْكُثُ فِي الأَرْضِ )
ده على اعتبار انه من المصلحين فى الارض فربنا هيوليه شئون الناس ولا ايه ما تعرفيش بس اهوه كل واحد بيشوف الايه اللى تمشى معاه
واخر كتب (إِنْ أُرِيدُ إِلاَّ الإِصْلاَحَ مَا اسْتَطَعْتُ وَمَا تَوْفِيقِي إِلاَّ بِاللّهِ عَلَيْهِ تَوَكَّلْتُ وَإِلَيْهِ أُنِيبُ )
طيب ماشى يا عم ما قلناش حاجه بدال ما تتعب نفسك وتفتح المصحف وتدور على الايه دى علشان تحطها فى يفطه مكتوب عليها اسمك اعمل عمل ينفع غيرك ووقتها فعلا هتكون ما تريد الا الاصلاح ومش لازم يعنى نستخدم ايات الله فى الحاجات والدعايه لنفسنا
وكان الناس كلها اتعدت من بعضها
خد عندك مثلا لو ربنا كرمك ونزلت اسيوط وحبيت تشرب عصير من عصير العربى هتلاقى معلق ايه (وَسَقَاهُمْ رَبُّهُمْ شَرَاباً طَهُورا)
ده على اعتبار ان العصير بتاعه هو اللى انزل فيه الايه دى والاعوذ بالله
ولا لو ربنا كرمك ورحت حضرت حفله افتتاح محل خد عندك ( انا فتحنا لك فتحا مبينا )

يا جماعه يا ناس يا بشر يا مرشحين ويا تجارين ويا اصحاب المحلات عمر ما كان ربنا انزل كلماته واياته للغرض ده وبعدين ده حرام
انت لو فتحت معايا موقع اسلام اون لاين وشوفت راى الدين فى موضع استخدام ايات القران فى الدعايه لوددت ان تنشق بك الارض قبل ان تفعل ذلك
لايجوز استخدام الآيات القرآنية في الدعاية الانتخابية لأن هذا امتهان لكتاب الله ومتاجرة به ولكن الأولي أن يتقدم المرشح ببرنامج يحترم فيه آيات القرآن وسنة النبي صلى الله عليه وسلم بما يشتملان عليه من خير الدنيا والآخرة Read more: http://www.islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1122528616798#ixzz0pRUjpELz

فى الاخر انا عايزه اقول كلمه واحده بس مش بكلامك ولا بادعاءك ولا بحبك ولا بسؤالك عن صحتنا واحوالنا ممكن ايها المرشح تكسب قلوبنا ولكن بافعالك اللى هتتحاسب عليها من الناس قبل من رب الناس
ولك ان تعلم الله اعلم حيث يجعل رسالته

والسلام ختام