2010/01/23

اختيارك حياتك


انا ما كانيش فى بالى انى اكتب حاجه ولا حتى انى افتح نت اصلا النهارده بس حسيت انى اللى شوفته لازم اسجله عندى علشان يكون حجه عليا وشاهد عليا يوم القيامه


شوفت ايه بقا ؟؟؟

يمكن لو انا كنت دخلت مدونه وقريت الموقف ده ما كنتيش صدقته فى الزمن اللى احنا فيه ده بس انا شوفته بعنيا يمكن دى رساله يكون ربنا بعتهالى او تنبيه او او المهم انى اللى شوفته هسجله هنا علشان يكون حافز قوى لى انى ما اضيعش حق ربنا ابدا


اللى شوفته ده مش اعلان فى حمله او صوره على النت او فديو على اليوتيوب ولكن ده انا شوفته بعينى وفى بلدى وعلى ارض الواقع


حاسه انكم بتقولولى لخصى بقا وهاتى من الاخر وقولى شفتى ايه؟؟؟؟


انا كنت فى طريق العوده الى بيتى وكنت راكبه الباص وراكبه ناحيه الشباك ولانى لوحدى دايما بحب اتفرج على منظر النخيل والنيل وكده وفى اثناء تمتعى بالمنظر ده شوفت منظر احسن منه بكتير وهو لشاب صغير على سطح مركب ( مركب عادى صغير جدا ) بيعمل ايه بقا

بيصلى؟؟؟

اه والله بيصلى لدرجه انى لفيت وشى علشان اتاكد انه بيصلى متخيلين المنظر المركب يادوب مكفيه بالعافيه وكمان ده على السطح يعنى مش جوه يعنى الشاب ده لو اختل توازنه فى اى لحظه يبقا خلاص غرق لانه كمان كان مش قريب من الشاطى وكمان ده نيل يعنى منك للقاع عالطول مش بحر تقعد تمشى فيه براحتك لحد ما تدخل فى العميق

انا كل اللى جاء فى بالى لحظتها انه بيصلى وسط المنظر الجميل ده ما فكرتيش فى حاجه تانى لحد ما دخلت البيت والعصر اذن وقولت اقوم اصلى وافتكرت الشاب ده وقعدت اسال نفسى هو معقول ما كانيش مقدر الخطر اللى هو فيه ؟؟

ولا هو لدرجه دى محافظ على صلاته لدرجه انه مش صبر لحد ما يروح بيته ويصلى براحته ؟؟

وياترى قد ايه ربنا فرح بيه لما شافه فى المنظر ده ما هاموش المكان ولا الزمان كل اللى همه هو اداءه لفرضه وبس وارضاءه لربنا مهما كان؟؟
وقد ايه الشاب ده بيحب ربنا ؟؟ واد ايه هو احسن اختياره لحياته ؟؟ وعرف ان صلاته شكر على نعم ربنا وقرب ووصل به رغم حداثه سنه؟؟ واللى كتير قوى فى سنه ليهم اهتمامات تانيه خالص ويمكن اخر حاجه يفكروا فيها هى الصلاه ؟؟


قولت يااااااااااااااااااااه ده لو كان المنظر ده فى حمله اقم صلاتك الاعلانيه كنا قولنا ده مبالغ فيه؟؟

تخيلوا لما تشوفوه بعنيكم ؟؟

هتحس قد ايه انك مقصر فى حق ربنا لانك بتكون فى بيتك وكل وسائل الراحه متوافره وبتسمع نداء ربنا وبتكسل تقوم
تقول لحظه لما اعمل ايه او اشوف ايه


انا مش بقول الكلام علشان انافق بيه حد او انى اظهر بصوره مش عارفه مالها

انا كل اللى اعرفه انى بسجل الكلام ده علشان يكون حجه عليا لان عنيا هتشهد عليا انى شوفت شاب وسط النيل بيصلى لربنا يعنى مهما كنت مش ليا حجه وليس هناك مبرر

انا بسجل الموقف ده حتى يكون حافز لى لاننى لا احد اجبرنى على كتابت ما كتبت ولا احد اخذها على حجه الا نفسى

وليكن هذا اختيارى ولتكن هذه حياتى فلا يوجد مبرر لعدم اقامه الصلاه فى ميقاتها


والله على ما اقول شهيد

هناك 9 تعليقات:

  1. رجل ذهب الى الله ...فجعله الله فى هذا المنظر الجميل
    كان نفسى المنظر ده يتصور علشان يكون صورة مشرفة نفتخر بيها
    اجمل حاجة فى الصلاة اننا بنلاقى نفسنا فيها

    تحياتى

    ردحذف
  2. تعرفي كلنا محتاجين الحافز ده
    واوقات ربنا بيوقع عنينا على حاجات زي دي لانه بيحبنها
    ومش راضي عن بعدنا وكسلنا في بعض الاحيان
    انا مبسوطة انك قولتي يكون شاهد عليكي
    وصدقيني على كل حد قرا
    يارب ساعدنا نطيعك كما ينبغي
    امين
    تحياتي

    ردحذف
  3. بجد تسلم ايدك
    والموقف دا فعلا حسسني قد ايه ان فيه ناس كتير
    لسه متمسكين ببقايا الدين
    اعتقد ان موضوع الصلاه موضوع خطير يطول الكلام فيه
    يكفي انها اول ما يحاسب عليه العبد يوم القيامه
    لفته جميله منك
    وفعلا انا تخيلت الموقف وكأني شوفته قدام عنيا
    تحياتي اليك

    ردحذف
  4. يـــــــاه بجد احنا مهما عملنا لربنا احنا برضو مقصرين في حقه
    جزاكي الله كل خير

    ردحذف
  5. تسلم ايديك بجد على البوست الرائع دة

    ردحذف
  6. ده على أساس انه مراكبى
    وليس حاملاً لرسالة دكتوراه فى الطاقة النووية

    " قل إن الهدى هدى الله "

    " ومن الناس من أضله الله على علم "

    بوست جميل

    ومدونتك جميلة

    ردحذف
  7. تخيلى أنك خلتى المنظر يترسم قصاد عيونى
    شكل النيل والمناظر اللى حواليه أكيد عارفاها بس شاب وبيصلى على قارب صغير بيصيد بيه وعدم صبرة على فرضه ... لأنه لا يعلم متى يقضى أمر الله
    سبحان الله على الورع الذى ينبت فى القلوب حين نبصر مشاهد شديدة القوة مثل تلك

    جميل جدا

    ردحذف
  8. كنت صورتيه طيب عشان فعلا ده منظر توحيد لله جميل جدا

    اكيد اللي رباه اكله حلال وعرفه ايه يعني الله الخالق والولد نبته خير

    انما الصنف التاني لبياكل حرام

    لمحدش رباه صح
    يهو عيل ابن كلب فطرته ملوثه وشيطانه ضاحك عليه

    ملحوظه تعليقك عندي عن اللقلاء مليان حقد مدمر ليه كده بس دحنا غلابه
    بدل متدعلنا تحقدي علينا اخص علي كده

    ردحذف
  9. الواحد اما بيشوف كده بيتكسف من نفسه انه ساعات بتروح عليه الصلاه و هوا بيشوف حاجه تافهه فى التليفزيون او بيقرا حاجه اتفه فى الجورنال
    بس الحمد لله ان فيه ناس قابضه على دينها فى وسط زمن المغريات و المغيبات

    تسلم ايدك

    ردحذف

قول اللى فى نفسك وعبر عن نفسك