2010/01/20

هى دى مصر يا عبله تحيا مصر






ازيكم يا شعب مصر عاملين ايه ؟ اكيد فرحانين بعد فوز المنتخب على منتخب بنين اللى كان بنات مش بنين قدام المنتخب المصرى





المهم انا اكتشفت حاجه مهمه جدا فى الحياه تعرفوا ايه هى ؟





هى عيشه الحريه الواحد لازم ياخد اجازه من الشغل يعمل فيها ريفريش لنفسه ويشوف الدنيا ماشيه ازاى من حواليه بجد ماحلاها عيشه الحريه





انا بقا خدت اجازه وقولت لما اشوف الاحوال فى مصر وفى بلدى بالاخص ماشيه ازاى قعدت اقلب فى الجرايد شويه على النت شويتين على انى انزل واشوف بنفسى تلات شويات يعنى من ده على ده وطلعت بالنتيجه دى اللى هاعرضها عليكم دلوقتى منها اللى يهاها ومنها اللى يهيهههه يعنى زى ما بيقولوا كده هم يبكى وهو يضحك









اول حدث فرض نفسه بقوه خلال الفتره السابقه على المنتديات والفيس بوك هو حادثه سد خرم الربع جنيه وبينى وبينكم انا مش عارفه ايه حكايه الربع جنيه ده بالذات مع الحكومه ووزاره الماليه ما تقولوش عدو اللى خلفوهم كان زمان ابن ناس ومحترم ومالى هدومه ومركزه ومره واحد كده وبدون سابق انذار لقينا هيبته نزلت من عين الناس وبقى يا حسره ربع فضيه ومش كده بس لا كمان عملوله عاها فى وسطه خرمه يا عينى وشكله الايام دى بدا يجر ناعم مع البنك المركزى او مره واحده كده حسوا ان اللى عملوه فى الربع جنيه زمان بيطلع عليهم دلوقتى وهو السبب فى الازمه الاقتصاديه وده من باب ومن اعمالكم سلط عليكم فقالوا نصلح غلطتنا بتاعت زمان ونسد الخرم ولكن ما كانوش عارفين ان ده ممكن يزعل الشعب اللى اتعود على شكل الربع وهو مخروم منهم ويودى الى ظهور جروبات تطالب بخرم الربع جنيه مره اخرى




واليكم صوره بسيطه جدا من رد فعل الشعب المصرى على هذه الحادثه




يعني أية يسدو الخرم




أزاي يعنيطب أية السبب




هو الخرم حرام ولا حرام




ولا يمكن يكون حرام




أنا من ساعة ما وعيت علي الدنيابقول الربع جنية المخروم




هقول أية دلوقتي




الربع جنية اللي سدولة الخرم




لازم ياجماعة نقف وقفة جامدة أنا عملت جروب أسمة "معا لخرم الربع جنية مرة تانية "ياريت كلنا نشارك في الجروب ونوقف المهزلة دي ونقول لا لسد الخرم شوف الربع جنية المخروم شكلة حلو أزاي صحيح مخروم بس مالي مركزة أما الربع جني الجديد فتلاقية هزيل ومسفوط ومش مخروم لازم ناس كتير تشترك في الجروب دة كل مشترك في الجرو ببمثل صوت بيقول"لا لسد الخرم"يلا أشتركوا وخلوا أصحابكم يشتركوا فوراخلونا نلحق نحل المصيبة دي رابط الجروب علي الفيس بوك:http://www.facebook.com/group.php?v=app_2373072738&gid=278365040588#/group.php?v=wall&gid=278365040588 t




اهوه اللى فوق ده هم يهاها (هههههههههههههههههه)








نيجى بقا للهم التانى والاكثر هههه هو يا استاااااااااااااااااااااذ يا وديييييييع




اكيد طبعا عارفين مين وديع اللى بقى اشهر من نار على علم وتهامى باشا والست مدام رشا اللى خربوا الدنيا وبوظوا البلد لكن اللى يمكن كتير فيكم مش عارفه هو وجود اكتر من جروب على الفيس بوك تطالب بتعين تهامى باشا وزيرا للتعليم العالى اه والله التعليم العالى اللى بقى مش عالى خالص وعلشان هو بقى مش عالى خالص ظهرت هذه الجروبات التى تطالب بتعين تهامى باشا وزيرا له لانه استاذ وبيفهم




وهو ده التطور الطبيعى للحاجه الساقعه لان زى ما قالونا زمان سميت وزاره التربيه والتعليم وسبقت التربيه التعليم لاهميتها ومن هنا كان مطالبه التعين هو اختيار موفق من قبل طلبه التعليم الواطى قصدى العالى






اما بقا الهم اللى فعلا يبكى بدل الدموع دم هو الخبر ده فبعد استيراد كل حاجه من الصين من الابره للصاروخ بقيت مصر بلد نهر النيل وبحيره قارون وفرعى رشيد ودمياط واسكندريه وكل الشواطى والبحار دى بقيت مصر بتستورد سمك من الصين ولو كان هيروديت عايش كان زمانه بدال ما يقول مصر هبه النيل يقول مصر هبه الصين






مش عارفه ليه الايام دى اصحاب قرار التغير الوزارى ما بقاش فى يد البشر فبعد تغير وزير النقل على يد جاموسه واللى ظهر بعدها جامعات تطالب بتعويض صاحب الجاموسه بجاموسه عشر



ايضا تم تغير وزير التعليم على يد الخنازير وانفلوانزتها



ربنا يحمى حيواناتك يا مصر عملوا اللى مقادرش يعملوه رجالتها



ربنا يرزقنا بحيوان كده عنده مفهوميه وانتوا عارفين الباقى بقا






سلفنى شكرا ................ اشحنلى شكرا..................... كلمنى شكرا



واحد شحات بيقول لواحد اعطنى مما اعطاك الله



قاله روح اتوكل على ربنا



رد عليه الشحات وقاله : اين الذين يؤثرون على انفسهم ولو كان بهم خصاصه



رد عليه الراجل وقاله : ذهبوا مع الذين لا يسالون الناس الحافا



الكلام اللى فوق ده ليس له علاقه بحمله فودافون للشحاته واللى معهوش ما يلزموش


الموضوع ده شغل ناس كتير جدا لدرجه ان فى الناس اللى غيوره جدا على دينها طلبت افتاء ما حكم الاشتراك فى خدمه كلمنى شكرا وهل يجوز شرعا ولا لا استنوا لما اجبلكم السؤال والرد علشان تصدقوا


السؤال ما حكم خدمة سلفني شكرا وهي خدمة تقدمها شركة فودافون مضمونها أن الشركة تقرض عميلها 2.5 جنيه رصيد مكالمات مقابل خصم 3 جنيه من رصيده عند أول شحن له تال، ونصف الجنيه الفرق بدعوى نظير الخدمة، وجزاكم الله خيرا؟

الفتوى الحمد لله والصلاة والسلام على رسول الله وعلى آله وصحبه، أما بعـد: فإن هذه الخدمة وإن حملت اسم (سلفني شكرا) ليست من باب سلف جر نفعا حتى تمنع، ولا تعدو أن تكون من باب بيع الخدمة مؤجلة بثمن زائد لو بيعت نقدا، لكنها تشتمل على جهالة في الأجل.وبناء على هذا التكييف فلا حرج فيها إذا حدد أجل التسديد ولو حملت الاسم المذكور الدال على السلف لأن العبرة بالمعاني لا بالألفاظ والمباني.أما إذا لم يعلم أجل السداد فإن العقد فاسد لجهالة أجل الثمن كما هو مقرر عند أهل العلم وسبق أن بيناه في الفتوى رقم: 103685. والعقود الفاسدة لا يجوز الإقدام عليها.ولمزيد من الفائدة تراجع الفتوى رقم: 34058، والفتوى رقم: 10456.والله أعلم.http://search.islamweb.net/search/query/redirect.jsp?qid=1612545&did=1050819&pos=1&idx=1&f id=كلام الشيخ مصطفى العدوي منقول من منتدى أهل الحديث والعهدة على الكاتب


كل اللى مكتوب فوق ده لو دل على شى فانما يدل علىمدى الانحدار الفكرى والتفاهه اللى ملات عقولنا وتفكيرنا فى الوقت اللى الامريكان والصين والهند حتى الهند اللى لما كنت تحب تشتم حد تقوله انت هندى يعنى كانت عار كله بيتقدم واحنا لسه بنتكلم فى ربع جنيه ووديع وتغير وزارى فاشل وحكم الدين فى تفاهات وكاننا راعينا الله فى كل كبيره وصغيره ناقص خدمه سلفنى شكرا


انا مش عارفه احنا رايحين فين






وهى دى مصر يا عببببببببببببببببببببببببببببببببببببببببببببببببببببببببببببببببببببببببببببببببببله

















هناك 10 تعليقات:

  1. بس بالرغم من كل دا بنحبها برضه صحيح نفسنا تبقى احلى بلد فى الدنيا بس ادينا بنحاول نكون احسن ناس فى الدنيا

    ردحذف
  2. بلدنا من سقوط لسقوط ماشيه

    ردحذف
  3. البوست مع انه بيحلم روح الدعابه
    الا انه فعلا حسسني بقيمة الوضاعة اللي وصل ليها الناس
    حتي انه بداو يهتموا بحاجات تافهه جدا
    ونسوا او تناسوا حاجات كتير اهم واولي
    بوست جميل
    تسلم ايدك
    تحياتي

    ردحذف
  4. مصر هبة الصين

    خدمة الحكومة الجديدة "اخنقنى شكراا"

    تحياتى

    ردحذف
  5. ده ربع جنيه مزور

    ردحذف
  6. بلدنا ... هي فين بلدنا
    البلد دي مش بلدنا
    البلد دي بلد اللى ما بيتهانوش فيها
    اللي ما بيشحتوش فيها ...اللى ما بيشيلوش الهم فيها
    اللي ما بيقفوش طابور عيش ...اللى ما بيتسمموش في مستشفياتها...اللى ما بيتبهدلوش في مواصلاتها...اللى ما بيتعذبوش بفسادها
    البلد دي بلد الناس دي
    احنا منهم؟؟؟

    ردحذف
  7. الربع المخروم دة خلاص اصبح تاريخ ولازم كلنا نحافظ علية

    اما سلفنى المفصود منها اكبر من كدة وبعديم هو فى حد بيسلف حد اليومين دول

    ربنا بقى يوفق مصر فى الماتش الجاى قولى امين


    مع خالص تحياتى

    ردحذف
  8. والله معارف اعلق واقول ايه

    مصر بتقع ولا هتقع ولا وقعت خلاص

    علي فكره تهامي ووديع ورشا بجد علماء مرحله تتسم بالأرف احنا زهقنا وكرهنا نفسنا من وديع وعز وشهاب الله يحرقهم كلهم البلد باظت يا وعد

    ردحذف
  9. مصر هبة الصين :( للأسف

    اللي عملوا الجروب ناس فاضية اكيد

    ردحذف
  10. رحيل دائما إلي اللا أخلاق لا ضمير لا شعب

    ازيك يا بروميس

    ردحذف

قول اللى فى نفسك وعبر عن نفسك