2009/12/11

اهوه كلام واد عم حديت



استفتاءات وخزعبلات




ازيكم يا مدونين ويا مدونات بعد ايام قليله هنودع عام بايامه ولياليه واحداثه وذكرياته ونستقبل عام اخر بكل شى مبهم فيه



وطبعا زى كل سنه تبدا اللعبه العقيمه والممله لعبه الاستفتاءات وما ان يبدا شهر ديسمبر فى العد التنازلى الا وتجد كل ما حولك من جرائد ومجلات واذاعات وفضائيات مليئه باستفتاء عن احسن مغنى اوحسن مغنيه واحسن تسريحه شعر ومش عارف ايه واهم الاحداث والكوارث والمصايب واحسن مسلسل واحسن فيلم وخد عندك بقا من الكلام ده اللى مش بينتهى واللى نبات فيه نصحى فيه ونودع العام اللى فات واحنا بنتمنا ان العام اللى جاى يكون احسن من غيره ولكن دون جدوى واهى ايام وبنعشهاها وبالمناسبه دى سيبونى اسالكم يا ترى ايه احسن حاجه حصلتلك السنه دى او الحاجه اللى بتتمنى تحصلك السنه اللى جايه عليكم بخير؟؟؟




خلى السلاح صاااااااااااحى




طول عمرى با سمع الاغنيه دى بتاعت خلى السلاح صاحى صاحى صاحى لو نامت الدنيا صحيت مع سلاحى سلاحى فى ايديا نهار وليل صاحى يا عينى عليك يا سلاحى


وما كنتيش اعرف ان السلاح غالى كده واغلى كمان من حياه البنى ادم الا لما شوفت الموقف اللى هاحكيه دلوقتى


حصلت حدثه بشعه نتيجه استصدام عربيه نص نقل فى عربيه شرطه المهم اللى حصل انى عربيات الاسعاف جات تنقل المصابين طبعا وبما انك فى مصر وبدون ما تكون شوفت اللى حصل اكيد عرفت انهم نقلوا الرتب بسرعه للمستشفى اسيوط الجامعى وسابوا طبعا العساكر زى مش عايزه اقول لفظ بس اكيد عارفينه مارمين فى الشارع بينزفوا فى دماءهم لحد كده وطبيعى جدا ومتوقع بما انك فى بلد لو كان فيها نهر النيل صلصه ما كنتيش كفاها كوسه


لكن اللى مش طبيعى واللى انا بستغربه جدا هو اللى حصل بعد كده عربيات الشرطه جات اوعوا تفكروا انهم جاءوا علشان ينقذوا العساكر اللى مارميه دى عالارض لسه دورها مجاش فى نقلها للمستشفى ولكن للاسف الشديد جاءوا علشان ينقذوا السلاح خشيه من سرقته والعساكر طبعا فاقدين الوعى ومن هنا طبعا عرفت ليه غنوا خلى السلاح صاااااااااااااحى طبعا لانه اغلى من حياه البنى ادم




اجساد الفقراء




الموضوع اللى حكيته فوق ده افتكرته النهارده وانا بقرا بريد الجمعه قصه لشاب فى العشرين من عمره فقد مستقبله باكمله بسبب حدثه طبعا ولانه فقير جدا وحرام على الفقراء انهم يعيشوا حياه نبيله وحرام على هذا المجتمع ان يعامل من مثلهم بنبل واخلاق ضاع مستقبله بس مش هو ده اللى انا هتكلم عليه دلوقتى لا انا هتكلم على حاجه تانى خالص على درس القصه اللى علمتوهولى درس ناس كتير لازم تتعلمه صاحب القصه دى ربنا انعم عليه بجميع انواع الابتلاءات اللى فى الدنيا واللى صعب جدا اى انسان ممكن يستوعبها ولو كانت حصلت لحد غيره كان قعد سب ولعن فى الدين العمر كله وقعد يقول ليه بسر كده يارب هو مافيش غيرى مصايب الدنيا كلها تنزل عليه ومع ذلك عنده رضا غير عادى وصبر يحسد عليه وشكر للنعمه بشكل يجعلك تسال نفسك الى هذه الدرجه يحب الله هذا العبد فى الوقت الذى اجد فيه كثير ممن حولى من الناس لا يعكر صفو حياتها شى من هذه المعانه وما ذلك دائما فى شكوى وقنط واكتئاب وبكاء وحزن وعندما تسال عن سبب هذا الحزن وسبب كل هذا السخط تجده شى لا يستحق وعندها تحس بانك ضعيف جدا ومقصر جدا فى حق ربك ولا تملك الا ان تقول


اللهم لك الحمد كما ينبغى لجلال وجهك وعظيم سلطانك اللهم دومها علينا نعمه واحفظها من الزوال وكفا بالاسلان نعمه ولك الحمد انى اشكرك واحمد الان يارب




وشووووووووووش وشوووووووووووش




ياااااااااااااه ده الواحد طلع عبيط بشكل رهيب تخيلوا ان الواحد كان قاعد فى البيت ومع انه مثقف وبيقرا ومتابع الدنيا ماشيه ازاى ولكن كانت معتقده ان الناس كويسه وبخير وان اللى بنشوفه فى التلفزيونات ده ما هو الا حبر على ورق وبنشوفه على وشوش ممثلين وبس


وما كنتيش اعرف ابدا انه كل الدنيا دى بتمثل دلوقتى بقيت بعانى جدا من مشكله وهى ازاى احكم على اى بنى ادم قدامى كله بيدخل من ناحيه الدين وكلهشغال تظبيط الظاهر والله اعلم بقا باللى جوه ازاى لوقت قريب جدا كنت معتقده انى بفهم جدا فى الناس واعرف احكم على ده من ده ولكن اكتشف انى ما اعرفش حاااااااااااااااااجه فى اى حاجه وانه كله لابس على وشه وشه الله اعلم بقا امتى هيقلعه




اكسر للبنت ضلع




كل ما افتح جورنان وعنيا تقع بالصدفه على صفحه الحوادث مع انى مش بحبها القى فيها مصايب وللاسف الشديد وراء كل مصيبه امراه على راى نابيلون فتش عن المراه لحد ما تعبت نفسيا بجد وقعدت اقول لنفسى ما كان من الاول الاباء لو يربوا بناتهم صح ما كنتيش الصايب دى كلها تحصل فى نوعيه من البنات لو سابوها اهلها على هواها هتضيع نفسها وعليتها كلها وراها وفلازم الاهل تشارك بناتهم فى كل حاجه مش يسبوهم كده منهم لدماغهم وبس انا واحده من الناس مهما كنت عارفه الصح من الغلط الا انى طول الوقت لازم اهلى يكونوا عنيهم عليا لان النفس اماره بالسوء كلنا ممكن بنزعل من شده الاهل علينا فى بعض الوقت لكن ده لمصلحتنا فى الاخر ازعل وقتها بس هتعرف بقيمتها بعدين على راى عمتى هى اللى مربيانى كنت لما ازعل منها لانها بتشد علينا تقولى بكره هتعرفى وتقولى يا بخت اللى بكانى وبكاء عليا ولا ضحكتنى وضحك الناس عليا وتقولى هما البنات كده اكسرلها ضلع يطلعلها ميه ربنا يخليكى ليا يا عمتى




شوقى الى من فى القبور




ياااااااااه مش عارفه ليه الايام دى مفتكره كل حد عزيز عليا مات افتكرت جدى اللى عمرى ما شوفته بس بحبه جدا من كتر حب الناس فيه وانهم دايما يدعوله ويفتكره دايما بالخير


افتكرت جدتى اللى ربتنى وانا صغيره واللى اول حد علمنى كل حاجه حلوه فى حياتى لسه يا جدتى لما بنام بقول الدعاء عند النوم وافتكرك ازاى كنتى بتعلمينا انا واحمد نقوله بطريقه حلوه علشان مش ننساه كنتى تقولينا قولوا نمت على جنب الميين توكلت على رب العالمين ونتم على جنبى الشمال توكلت على ربى الرحمان بس انا دلوقتى كبرت وعرفت الصيغه الصح ليه وبقولها وبدعيلك ربنا يجزيكى عنا كل خير زى ما ربتنيا واكرمتينا


افتكرت كمان الشيخ صلاح اكتر شيخ اثر فيا لانه كان مقيم بشكل دائم عندنا افتكرت ازاى كان بيحفظنا القران بطريقه سهله وازاى كان بيهتم بيا قوى ويحفظنى وحرصه على تعلمى اللغه العربيه ويخلق روح منافسه بينى وبين احمد اخويا لسه فاكره يا شيخ وانت بتقولى قولى يا امانى كلامنا لفظ مفيد كاستقم وازاى كنت بتضحك عليا لما اقول ان غاب عنى حبيبى همنى خبره حتى تعلمنى احكام التجويد الان يا شيخى اتعلمها بشكل اوضح وبعلم اوضح وانا مدركه اهميه علم التجويد


شيخ صلاح لسه كل تسجيلاتك عندنا بنسمعها انا واحمد ونقعد نفتكرك دايما ولا نملك الا ان تنساب دموعنا من اعيننا ولا نملك لك الا الدعاء اسكنك الله فسيح جناته وجعل كل حرف علمتنى ايه فى ميزان حسانتك


لكل سكان القبور شوقى ودعائى بالرحمه والجنه




الحكم بعد تجربه




اصعب حاجه ان الواحد يحكم على حاجه بدون ما يشوفها او يجربها واصعب حاجه ان الواحد ياخد على كلام الناس الكلميتن دول انا بقوله لصحبتى اميره ولنفسى برضه لانى انا وهى كنا ضد عمل المراه تماما ولكن قولنا نجرب علشان لما نسيب الشغل نكون عن اقتناع تام ان اللى عملناه ده هو اللى صح وان علشان احنا هنعمل كده علشان نيتنا صح فاكيد ربنا هيعوضنا عنه بالاحسن والافضل اما بخصوص كلام الناس فاحنا عارفين ان معظم الناس هتلومنا على اللى هنعمله او اللى ربنا ان شاء الله يقدرنا ونعمله ولكن الناس مش بتفكر زينا ومحدش عاش التجربه معانا علشان يحكم علينا


اهم حاجه ان الوااحد يجرب وبعدين ياخد القرار ده فى اى حاجه فى الحياااااااه
ايها الولد واعتذار واجب
كنت قولت انى هنزل بوست عن كتاب ايها الولد للامام الغزالى الحقيقه بعد ما قريت الكتاب ده للاخر حسيت انى مش ينفع انى اكتب عنه لانى اقل بكتير من انى اكتب عن الكتاب ده فعلشان كده ان بعتذر ليكم جميعا


اولويات فى الدعاء


الواحد بيحس انه كل فتره من الوقت لازم يعيد ترتيب اولوياته فى الدعاء الى الله فى هذا الوقت اجد انه من الاولى ان ادعوا الله ان يايتنا من لدنك رحمه وهيى لنا من امرنا رشدا وان يدبرلى امرى فانا لا احسن التدبير وان لا يكلنى الى نفسى طرفه عين ولا اقل من ذلك وان يتولى امرى فى مقدمه دعائى وسؤالى الى الله واى شى اخر ياتى فيما بعد




انا حاسه انى اتكلمت كتير بس دى حاجات حسيت انى لازم ادونها مش عارفه ليه بس لانى تعبت من كتر ما بكلم فيها نفسى وبس




دمتم بكل خير واهوه كلام واد عم حديت محدش ياخد فى باله












هناك تعليقان (2):

  1. "دمتم بكل خير واهوه كلام واد عم حديت محدش ياخد فى باله"

    بعد كل ده دمتم بخير
    ههههههههههه
    يابنتى حرام عليكى
    ايه كمية البؤس دى

    بصى انتى تيجى عندى انا عندى بوست هيعجبك

    وهابى نيو يير :)

    ردحذف
  2. موضوع الضباط والعساكر ما هو إلا تجسيد لحال البلد دلوقتي..ناس درجة أولة وناس ترسو بكل أسف...نفس الشيء ينطبق على حكاية الشاب الفقير
    حوادث العنف بكافة أشكالها تزداد تجاه البنات..الموضوع مالوش علاقة بالتربية قد ما له علاقة بالنظرة الدونية للمرأة في المجتمعات الشرقية لدى الأغلبية العظمى
    لسه المرأة مخدتش الكثير من حقوقها وعشان كده تعامل على أنها كائن ناقص يجب أن يخضع لسيادة الذكر
    تحياتي

    ردحذف

قول اللى فى نفسك وعبر عن نفسك