2009/07/12

بهيس بصوووت عالى

معاااااااااااااكى بهيس بصوت عالى طبعا مش مدونتى وانا حرة فيها اغليها واشويها واعمل اللى عايزاه فيها

وقبل ما ابداء تهيس واطلع كل شى فى نفسى





هقول كل سنه وانتوا طيبين لاتنين من اعز اصدقائى ومن اكثر الناس قربا الى قلبى بمناسبه عيد ميلادهم وربنا يجعل كل امانيهم خير محققه ويرزقهم رضا الله ونعمه وستره افتكر ان دول اهم حاجه فى الدنيا واى حاجه تانى تيجى بعدين.





استعنا على الشقا بالله










نبدا نهيس




والله بينى وبينكم انا الايام دى مش مظبطه خالص ولا عارفه نفسى انا رايحه فين ولا جايه منين تشتت رهيب فى الافكار وعدم القدره



التركيز حاسه انى بتحرك بشكل مستمر نحو هدف بس مش عارفه ايه هو الهدف ده بالظبط عامله زى الجماعه اللى فوق دول.




ولذلك قررت انى اعلن السلام النفسى وهاوقع على المعاهده وهطلع كل اللى جوايا حتى ولو كان اللى جوايا ده كلام فارغ او كلام وخلاص بس اهووووووووووووو سلالالالالالالالالالالالالام ابدى ونفسى .



واول واحد هعلن السلام معاه هو ابى وهوجه اليه الرساله دى اللى اكيد مش هيقراها بس عنده علم بيها لانى غلبت انى اقنعه بس مافيش فايده ولازم اطلع اللى جوايا احسن بعدين يجيلى شوجر.


رساله الى ابى



بص يا بابا انى هجيب من الاخر فى كاتب ايرلندى مش فاكره اسمه ايه بيقول كلمه حلوه قوى بيقول ايه بقا ( تعرف أنك عاشق حين تبدأ فى التصرف ضد مصلحتك الشخصيه ) المختصر المفيد انى عاشقه لك جدا يا أبى ولذلك وافقت على رغبتك فى التقدم للعمل فى احد البنوك وسبحان الله اعدى فى الاختبار ومن ثم المقابله الشخصيه ومن ثم يتم تعينى وده لانى مش عايزه اشتغل اصلا أو بمعنى اوضح ارفض العمل فى البنوك ولكن خوفى من عدم برك وارضاءك جعلنى اتقدم لهذه الوظيفة .



فأنا رفضى نابع من الشبهة الدينية الموجوده فى الوضوع ده ناس تقول حلال وناس تقول حرام أينعم أنا عارفه أن مش كل شغل البنوك حرام وأن القسم اللى هشتغل فيه برضه مش حرام وأن الاعمال بالنيات بس خايفه أنى اكون بضع هواى فى كفه والحق فى كفه تانيه خالص وبرجح كفه الهوى واللى فى الواقع مش هواى أنا ولكن رغبتك أنت.



شىء أخر اريدك أن تعلمه وهو رغم نشأتى فى بيئه تقدر دور المرأه العامله ولا ترفض فكره عمل المرأه وبالرغم من مستوى تعليمى المرتفع الا أننى ضد عمل المرأه ورفضى لعمل المرأه نابع من فكره ان للمرأه مسئوليه عظيمه وأهم وأن نجاحها فى تحقيق هذه المسئولية العظيمة هو النجاح الامثل .



وكمان حاجه تانيه أنى ليس لدى اى رغبه فى التعرف على اناس جدد فى حياتى فأنا احمد الله حمدا كثيرا مباركا فيه على أصدقائى وأصحابى الذين خرجت بهم من مرحله ابتدائى الى وقتنا هذا كما أننى أرفض ما يسمى بالزماله فى العمل سواء كانت فى حدود او فى غير ذلك وانطباعى ده من كثره المصائب التى تحدث تحت ما يسمى بالزماله .



شىء اخر هو أننى مازلت أنظر الى الناس بعين الرضا على الاقل فى بلدى وارى منهم اشياء كثيره جميله فاخشى أننى حين اخرج الى العمل استصدم بغير هذا مما يشكل عندى اضطراب نفسى .



لا اتذكر يوما أنى عنيت من الفراغ فأنا والحمد لله مشتركه فى معظم الجمعيات الخيريه فى بلدى والتى لا ابخل عليها بأى جهد يذكر كما أنى لدى الكثيرلعمله فى حياتى فليس لدى الوقت الفارغ حتى امله بالعمل .



أنا قولت الكلام ده لاصحابى كانوا هيخنقونى وكنت محل تريقه منهم ومنهم من وصفنى بأنى اتبطر على النعمه فى الوقت اللى غير من الشباب مش لاقى اى وظيفه .



ولكن هذه هى وجه نظرى وهذا هو الواقع الذى تفرض علينا حقائقه فى كثير من الاحيان ان نتصرف ضد امالنا واحلامنا .



قدر الله وما شاء فعل ولعله خير.




مازلت اهيس.


فرحى وأنا حره فيه


أعانى بشدة من الاخر رغم عدم تقبلى له ألا أننى لا أستطيع أن الغى تأثيره أو أن أنكر وجوده رغم أننى لا اعباء كثيرا بكلام الناس ألا أننى أيضا يهمنى أن اعلم رايهما تفوقت معاناتى على معاناه جحا وابنه الذى حاول عبثا ان يرضى الناس ولكننى أرى نفسى اكثر ادراكا من جحا ولذلك فأنا اسعى الى ارضاء رب الناس قبل الناس.


وبسبب كلام الناس وعن كلام الناس دار هذا الحوار بينى وبين اصحابى فى احد الجمعيات الخيريه.


فى يوم خدنا الاطفال الايتام فى رحلة نيلية وسبناهم يستمتعوا بجمال النيل واحنا قعدنا نتكلم شويه وكان بيننا واحده صحبتنا مخطوبه جديد ودار هذا الحوار


البنات: مبروك يا دينا وأن شاء الله الفرح امتى ؟


دينا : قريب أن شاء الله 13 /8


البنات: وهيكون أسلامى ولا عادى


دينا : والله أنا كنت عايزه أسلامى بس خطيبى عايزه عادى


البنات: لالالالا يا شيخه اسلامى أيه ده اعمليه عادى احسن امال ازاى فرح


دينا : والله بالعكس انا كنت معزومه فى فرح واحده صحبتى وكان فرحها أسلامى وكان جميل جدا .


كل الكلام ده وانا بسمع بس وبتفرج على النيل لحد ما واحده صحبتى سالتنى وانت بقا رايك ايه فى الفرح


انا: انا اصلا مش هعمل فرح


البنات فى صوت واحد : ليه بتقولى كده اعوذ بالله منك يا شيخه انتى مش وش نعمه انتى فقريه والى أخره من نفس الكلام.


انا: يا جماعه اسمعونى الاول وبعدين ابقوا احكموا عليا


البنات: ها قولنا رايك


انا : انا بقول ان الفرح سواء كان اسلامى او عادى بقا شىء تقليدى جدا لدرجه انك بتكونى قاعده فى الفرح وعارفه الفقره اللى بعد كده ايه نفس البرنامج الملل والروتين القاتل ونفس الاغانى ونفس الاشخاص اللى بترقص بطريقه هستيريه .


فأنا بقول أن لو الواحد سافر مكان جميل مثلا أنا نفسى اروح اسبانيا او ماليزيا جنه الله فى ارضه او يعمل عمره افضل بكتير من الفرح .


البنات: يا سلالالالالالالالالالام طيب وكلام الناس يقولوا مالها دى ياختى ماعملتيش فرح ولا خلوا حد يفرح معاهم


ولا انتى اصلا فاكره اهلك هيوافقوا انتى شكلك هيستى على الاخر وبعدين انتى لما تشوفى فرحه اصحابك واهلك بيكى تتمنى لو انك تعملى كل يوم فرح.


وبعدين انتى ليه معتقده انه هيكون مش معاه غير مصاريف الفرح اللى بدال ما هتصرفوها على الفرح تطلعوا بيها رحله ما أنتوا ممكن تعملوا الاتنين يا ستى .


انا : شكلكم اصلا مش عايشين فى الدنيا فين الشاب اللى يقدر دلوقتى يعمل ده كله ده كفايه اصلا انه فتح بيت


البنات: طيب يوم فرحك هنفكرك بكلامك ماشى ؟


انا : بينى وبينكم خوفت وعملت زى اللى بيقول احترس السياره ترجع الى الخلف


فقولت ياااااااااه يا بنات انتوا كده دايما تسبقوا الاحداث احنا فين والكلام ده فين اصلا ده مش وقته خااااااااااااااااااااااالص


ووقتها الناس ممكن يكونوا يقبلوا بفكره زى دى تعالوا بس نلعب مع العيال .



مازلت اهيس

قلبى خشب

تسلم يا غصن الخوخ يا عود الحطـــــــــب

بييجي الربيع .. تطلـــــــــــع زهورك عجب

و انا ليه بيمضـــــــــــي ربيع وييجي ربيع

و لسه برضك قلــــــــــــــــــ بي حتة خشب

عجبي !!!

ولسه برضه بهيس

قدمت اعذارى


مسافر بكره ان شاء الله اقدم اعتذار عن تدريب لمده ثلاثه اشهر او تقليل المده


ادعولى انهم يوافقوا وارجع مجبوره الخاطر.


اكبر ذكاء انك يكون عندك مدونه تفضفض فيها مع نفسك تعرف اراء الناس وحتى لو حد ما عبركش اهوه اسمك بتطلع اللى جواك.


انا عارفه انى التدوينه دى طويله اديلى يومين بكتب فيها اصلا بس بعدد الايام اللى هقضيها بعيد عنها


ادعولى والى لقاء بأذن الله.

هناك 21 تعليقًا:

  1. السلام عليكم

    جميل هذا التهييس ، اسمحي لي أن أشترك معك فيه ..

    *أعجبني رد فعلك تجاه وجهة نظر أبيك ، بقدر إعجابي برأيك في وجهة النظر ذاتها ، وأذكرك من الآن أن الله سيسوقك إلى ما يرضيه رغما عنك ، فأنت فررت من طاعة الله إلى طاعة الله ، أحييك بشدة .

    *العمل والزمالة أختلف معك في وجهة نظرك فيهما ، واختلافي ليس منبعه ضعف وجهة نظرك ، بل إني قد أنصح بنفس وجهة النظر غيرك ، إنما أختلف معك لأنها خرجت منك أنت ، فقليلون من يجيدون وضع الأمور في نصابها ، وإسقاط المسميات على مدلولاتها وأظنك منهم ، (بالبلدي كده انتي تقدري تفرقي بين الزمالة والاستهبال ، وبين العمل الجدي وقعدات المصاطب) ، وأنا شخصياً لست من مؤيدي نظرية الترك لظن ، فأنا لا أترك إلا ليقين ، ومن آتاهم الله إيماناً في نفوسهم عليهم أن يتحملوا تبعته ويواجهوا لا أن ينزووا ويرفعوا أيديهم.((وجهة نظري))

    *حكاية الفرح دي تفتح باب كبير جداً لمناقشة ، كيف يتم التغيير ؟؟؟
    هل الإيمان بالقضية وحده يكفي ؟؟ هل إرادة التغيير وحدها تكفي ؟؟
    إذا كان من الصعب أن يغير المرء معتقداً أو عادةً عنده تصل لدرجة الاعتقاد ، فكيف يغير عادة الناس تجاهه ، وبالله عليك كيف يغير عادتهم هم أنفسهم في أنفسهم ، الأمر صعب جداً لأنه مختص بالناس وعاداتهم ولأن مجتمعنا كما تعلمين يكاد لا ينفصل الشخصي فيه عن العام ، وكمان الفرح ده بالذات فرح أخويا وأختي فتخرجي منها انتي وسيبيها تعدي .. ههههههههه.

    *غريبة انتي كمان مغرمة بجاهين ورباعياته ، مش هقولك أكتر من ان تليفوني بيرن برباعية لصلاح جاهين
    يأسك وصبرك بين ايديك وانت حر
    تيأس ما تيأس الحياة راح تمر
    أنا دقت من ده وده عجبي لقيت
    البر مر وبرضك اليأس مر ... عجبي

    *الحمد لله أنك اقتنعت بأهمية وجود المدونة ، بل وأضفت أنه اقتناع بذكاء ....


    أعتذر للإطالة

    تحياتي ودعاءي بكل الخير

    ردحذف
  2. غير معرف13/7/09 18:47

    ***************************
    هذا كما أننى أرفض ما يسمى بالزماله فى العمل سواء كانت فى حدود او فى غير ذلك وانطباعى ده من كثره المصائب التى تحدث تحت ما يسمى بالزماله .
    *************************************
    معاكي جدااااااااا
    طيب قوليلي بقي و أنت في الجمعيات الخيرية إزاي بتقدري تحافظي علي نفس مبدأك

    أصل أنا لسه جديدة في موضوع الجمعيات الخيرية ده
    بس بجد ...ضميري بيوجعني جدااااااا
    مع إني عاملالي حدود رهيبة ..!!!!

    نصيحة قليلية تمنع بلاوي كتيرة

    ترجعلنا بألف سلامة يا قمر ...
    حتوحشيني

    تحياتي
    سلمي الجديدة

    ردحذف
  3. السلام عليكم
    ورحمة الله

    التهييس جامد بس في نتيجة

    بصي يا ستي البوست بتاعك كبير شوية بس أقد اقولك أن العمل في البنوك ليس شبهة ده محرم اساسا

    ربنا يسعدك بزوج صالح

    علي فكرة أنا راجل مش بنت

    ردحذف
  4. دكتور هيثم:

    احب اقول لحضرتك انى اكتشفت انه لكى تحافظ على عقلك فعليك بالتهيس لان التعقل كاد ان يفقدنى عقلى وشكرا على مشاركتك لنا فى التهيس.

    اما رد فعلى تجاه ابى فانى وجدت انه من العدل ان الحق يقابله واجب فلقد انتظرت كثيرا ان يعدل ابى عن قراره ولكن دون جدوى فاحسست انه من واجبى تجاه ان البى له رغبته حتى لو كانت ضد ارادتى الشخصيه ( بس بعد ما خدت كلمتين حلوين طبعا ).
    ولكن لا اخفى عليك خوفى وقلقى من شيئين :
    اولا : اننى سوف احس انى مرغمه على عمل ليس لى رغبه فيه فسوف يكون الناتج انى اعمله ليس على اكمل وجه فيكون جائى مخالفه قول سيد الخلق (ان الله يحب اذا عمل احدكم عملا ان يتقنه )فابوء باثمى .
    ثانيا : اننى اتعبعت فى موافقتى على موقف ابى بعد الافتاء واراء بعض المشايخ فاخاف ان يكون موقفهم تجاهى كالذين قال الله تعالى فيهم
    إِذْ تَبَرَّأَ الَّذِينَ اتُّبِعُوا مِنَ الَّذِينَ اتَّبَعُوا وَرَأَوُا الْعَذَابَ وَتَقَطَّعَتْ بِهِمُ الأَسْبَابُ

    فيكون رد فعلى ان اتمنى لو ان تكون لى كره فاتبرا منهم كما تبروا منى .
    ربنا يعافينا جميعا
    **************************

    بالنسبه للفرح ففعلا ده موضوع طويل ومشكله جامده وصعب جدا تغيرها ففى الوقت اللى فى ناس كتير نفسها تغير الا انهم يخافوا من رد فعل الناس وكلامهم

    ولكننى اجد ان هناك اناس كثير يضيعوا الكثير من اوقاتهم فى الاستعدادات للفرح والتفكير فى تفاصيل الفرح ويبخلون بجزء من تفكيرهم هذا فى حياتهم بعد الفرح والمرحله الجديده المقدمون عليها فيفكرون فى الفرح الذى لن يستمر لاكثر من ساعات ولا يفكرون فى عمر باكمله وهو الاجدر فى التفكير والاستعداد.
    بالنسبه لفرح اختك فهى برضه غاليه عليا جدا واتمنا لها كل الخير والسعاده وربنا يوفقهم لما يحبه ويرضاه
    وانا طلعت منها فعلا انا بس كنت بقول راى وهى كان معجبه بيه بس قالت صعب تنفيذه لا اكثر.
    **************************

    جاهين قد يكون اكبر مشكله فى حياتى لانه فاهمنا جدا وتحسه عايش جواك وجابلك كل حاجه ممكن تدور فى حياتك

    ولكن لا ينافس حبى لجاهين احد اكثر من المسحراتى (فؤاد حداد )

    *********************

    انا اللى بعتذر من حضرتك على الاطاله ولك منى جزيل الشكر
    وخالص التحيات والدعاء
    والسلام ختام

    ردحذف
  5. سلمى الجديده:

    انا مش عارفه حضرتك منين ولا نظام الجمعيات اللى حضرتك مشتركه فيها ايه؟
    لان عندنا الموضوع مافهوش اختلاط اساسا كلنا بنات او قد يكون فى مشاركه للولاد بس فى اوقات تانيه الله اعلم

    على العموم اى واحده بتكون جديره انها لا تكون فى محل شبه وبدال حضرتك عامله حدود رهيبه فافتكر ان ما فيش حد هيقدر يضيقك لان الفتاه من البدايه هى اللى بتعطى الفرصه لاى حد انه يحترمها او يضايقها انتى المسئوله عن نظره الاخر لكى

    وانتى اكيد هتوحشينى برضه
    وشكرا على مرورك الكريم ويارتك لنا
    والسلام ختام

    ردحذف
  6. شجر الليمون

    اولا بشكر حضرتك على الايضاح
    ثانيا بعتذر جدا لان البوست طويل حقا واسفه لو كان ضيضك .

    بالنسبه لموضوع العمل فى البنك الله اعلم ما اقدرش افتى فى موضوع زى ده وانا ليس بجديره ولا صاحبه علم

    ولكن ممكن حضرتك تراجع اراء الشيخ محمدحسان
    او الشيخ يوسف القرضاوى بخصوص الموضوع ده

    وشكرا جدا على زيارتك ومرورك الكريم وبعتذر مره تانيه

    والسلام ختام

    ردحذف
  7. السلام عليكم


    هههههههههههههههههه

    ايه ده الجمال ده كله
    ربنا يوفقك يارب وطبعآ انا زيك كده حره بمدونتى اعمل اللى يعجبنى فيها ومش يهمنى

    اعملى مثلى كده بالظبط

    ربنا يدلك على طريق الخير وربنا يرزقك الزوج الصالح ولى انا كمان ولبنات المسلمين

    تقبلى مرورى

    انوسه
    بد

    ردحذف
  8. اهلا يا استاذه مساء التهييس ايه التههيس العالي ده اولا انا عايزك تقدري ظروفي اني هكتب رد لاني هكتبه وانا موبايل عشان الجهاز بايظ اذن انا اعاني بشده جدا ولكن هرد عشان المدونه دي عسل وبتفكرني بمدونه واحد رايق اسمه ولا بلاش امن الدوله في كل حته وبسم الله نبدأ

    ردحذف
  9. اولا انتي شكل دماغك مليانه حاجات متداخله و تفكيرك مهيس خالص انا اتلخبطت اصلا وافتكرت انك كاتبه تلت مواضيع وبحاول ارد علي كل واحد لواحده انا دماغي لفت من البوست ده يا رب اخرج علي خير من هنا

    ردحذف
  10. ثانيا اسلوب كتابتك جميل جدا وشكلك فعلا تعبتي وكتبتي وعدلتي كتير بس موضوع حلو ومش مهم طويل بس حلو قوي قوي ودماغك اينعم راحت لمواضيع مختلفه بس الواحد لم الافكار كلها الجمله الايرلنديه حلوه قوي وانا مقتنع بيها وانا عشان مطولش انا مقتنع بكل كلامك خصوصا بتاع الفرح حاجه مكلفه وملهاش لازمه بس انا معترض علي حاجه مش لازم يبقي عندك استعداد انك تعرفي ناس جديده بس متقفليش علي الموضوع من اساسه

    ردحذف
  11. انا جيت تاني عشان نسيت اوقع معاكي الاتفاقيه وبشيد برأي سيادتك اللي اول مره اسمعه من بنت في عمر الشباب بتقول انا ضد عمل المرأه وانا بحترم رايك جدا وهو رأي معظم البنات مش هتعترف بيه وكمان البنات بيسمعوا عن حال الشباب بس تلاقي فين اللي تقدر ظروف اللي هيتقدملها مش كتير بس انا عجبني تهييسك جدا

    ردحذف
  12. صحيح ربنا يوفقك في الشغل وتعرفي تاخدي الاجازه كمان ورؤيتك بالنسبه لموضوع الزماله في العمل كويسه جدا وخاليه من المواد الحافظه والتهييس ومش هزود عن كده غير اني اقول لو ده تهييسك فأنا ادعو الله ان يكثر من تهييسك و يقلل من تركيزك

    ردحذف
  13. علي فكره انا عمري ما شوفت مدون رخم زيي يرد كل ده في بوست واحد ومن علي نت الموبايل اكيد مدون رايق بمدح في نفسي يعني بصراحه بس انا قولت ارد اخر رد عشان اقولك حاجه واحده اكيد هتفهميها علطول لا في ايدي سيف ولا تحت مني فرس وخديلك ساتر من الشمس

    ردحذف
  14. عاشقه الاحزان
    يانهارى طيب ازاى دى ؟

    ربنا يجعل ايامك كلها فرح وسعاده ويبعد عنك الحزن اللهم امين.

    وطبعا يا ستى مدونتك وانتى حره فيها المدونه مدونتك والبيت بيتك والغيط غيطك وكل بين ايدك
    هههههههههههه

    ربنا يرزقك بزوج صالح يكون قره عينك ويكون عونك للفوز باعلى الجنان ورفيقك فى الدنيا كى تسبحى الله كثيرا وتذكيره كثيرا انه كان بك بصيرا وبنات المسلمين جميعا

    شكرا على مرورك الكريم ولك خالص تحياتى
    والسلام ختام

    ردحذف
  15. the illusioist

    يا خبر ابيض من الموبيل ده انا مكسوفه منك جدا لانى تعبتك على الاخر وبعدين ازاى حضرتك تكون بشمهندس كبير قد الدنيا وجهازك بايظ اكيد ده نتيجت سؤال عمتك هو الوندوز ده رقمه كام اكيد هو كمان ما استحمليش السؤال فضرب عالطول
    هههههههههههههههههههههه

    فعلا معاك حق بخصوص انى مش لازم اقفل عالطول بس عارف احساس انك مش عندك قابليه انك تتكلم مع اى حد اصلا وانك لو حولت تتكلم هتحس انك هتكلم اللى قدامك ده بطريقه مش كويسه لانك اصلا تحت ضغط
    هو ده احساسى فعلشان كده انا هاخدها من قصيرها ومش هفكر انى اقوى علاقتى باى حد من الطرفين سواء بنات او اولاد (الاختصار عباده)

    صدقنى فى الزمن ده بيت المراه اولى بيها كتير من الشغل علشان بعد كده ما نرجعش نندم اننى ما ربناش العيال كويس او الجيل ده فاسد او الكلام ده
    على فكره ده مش راى انا بس انا كنت قريت من كام شهر خبر فى صوت الامه فى الجزء اللى بيكتبه محمد عبد القدوس تحت اسم يا بنات بيقول ان واحده فى امريكا وصلت لاعلى المناصب وحرمت نفسها من الامومه فى الوقت الذى كانت لاتعانى فيه من اى موانع للحمل الا انها حرمت نفسها بكامل ارادتها فالان تتندم اشد الندم وعلى اتم استعدادها ان تدفع ثروتها كامله من اجل ان تستمع الى كلمه (_ماما)
    فهما وصلت المراه لاعلى المناصب ليس لها الى بيتها وعائلتها وده راى صحيح 100%

    بالنسبه للتهيس فاطمن انا هفضل مهيسه عالطول لان التعقل كاد ان يفقدنى عقلى

    رسالتك يا بشمهندس وصلت انا خدت ضربه شمس من زمان



    شكرا جدااااااااااااااا
    تعبناك جدا طبعا لانى مجربه الموبيل مشكله
    لك منى خالص التحيات والسلام ختام

    ردحذف
  16. يعنى ضربه الشمس طالتك

    طيب خلاص
    مفيش امل يا حاجه
    الله المعين بقى
    وشوكرا على المعلومه بتاع كساب دى
    وفعلا
    انا متاكد ان جهازى اتشل من عمتى عشان الويندوز
    وانا ملاحظ ان كل لما اقرب منه يقول
    بلاش ويندوز بلاش ويندوز
    اعتقد انه تعبان نفسيا
    ده محتاج دكتور نفسى مش مهندس
    واخيرا
    انا بحترم رايك قوى بتاع الست اللى تربى ولادها
    بجد ده اسلم راى لاى ست بتخاف على ولادها المستقبليين
    وعندها رؤيه وقناعه
    بس ليا سؤال صغنن
    مينفعش اركب كى بورد للموبايل زى بتاع الكمبيوتر عشان انا صبعى وقع خلاص
    وسلامو عليكم

    ردحذف
  17. جارتى العزيزة
    هنمشيها تهييس ونعديها المرة دى
    بس انت مش بتخرفى .. يعنى هو من حق كل بنى أدم أنه يكون مرتاح نفسيا فى عمله . حتى لو مفيش شغل ولا حد لاقى ومحدش طايل ... كل دة كلام جميل .. بس الراحه النفسيه فى العمل مهمه جدا
    فرح بقى والا مفيش فرح دى حاجه بتفرح الاهل أولاً بس حقيقى دلوقت بقى فيه ناس كتير يستغنو عن الافراح
    انت هتغيبى كل المدة دى بجد ؟
    ربنا معاكى ويوفقك يا قمر وترجعى بالسلامه

    ردحذف
  18. the illusionist
    يا بشمهندس الحاجه ام الاختراع تخيل نفسك معايا كده ماسك موبيل مش باين من كفه ايدك وجارر وراك وهى اصلا مالهاش حل غير انك تجرها وراك كى بورد ياه منظر فظيع وبعدين ليه ده كله افتكر ان الحل الامثل فى الموضوع ده (معلش اصلى انا خيالى واسع وانت بسؤالك ده لعبت فى دماغى فاستحمل ) الحل الامثل انى تغير الموبيل اصلا وويكون اللعب كله فى الموبيل يكون موبيل بقلم ضوئى وممكن وقتها مش ترد بس لا انت تعمل شات كمان

    اى خدمه يا بشمهندس
    بالنسبه للكمبيوتر فخليه يتصل باسامه منير يمكن يلاقيله حل


    دمت بكل خير وارحم الرصيد
    والسلام ختام

    ردحذف
  19. صفاء جارتى وصديقتى العزيزه

    صدقتى الراحه النفسيه اهم مطلب على الاقل علشان تعرفى تعملى شغلك بذمه وضمير واستمتاع بس الحمد لله على كل حال.

    بالنسبه لمده التدريب انا روحت امبارح احاول انى اقدم اعتذار وللاسف قوبل بالرفض وحتى كمان المده فادراه البنك معندهاش فكره قد ايه لان ده من اختصاص فريق التدريب بس بيقولوا انها اكيد مش اكتر من شهرين ومش اقل من شهر
    يعنى ربنا يستر
    عايزه اقولك انى من امبارح وانا مدمره نفسيا لان المفروض ان التدريب ده هيبدا يوم الاحد بس مش عارفه على اى اساس لانى مش مستعده اصلا

    ومفيش حاجه شاغله تفكيرى الا ازاى انا هقعد الفتره دى كلها بعيده عن اهلى
    يالا ربنا المعين وربنا يهون علينا الامور

    دعاوتك

    والسلام ختام

    ردحذف
  20. السلام عليكم ورحمة الله

    لا تعتذري يا سيدتي الخطأ وارد من أي منا ويكفي مرورك الجميل بمدونتي

    لك تحياتي

    ردحذف
  21. ممتاز ممتاز ممتاز

    بس أنا لو قعدت أعلق على كل التدوينة يبقى حاهيس

    بس على كل حال أنا بحب الدماغ اللي تبص للدنيا من فوق

    ردحذف

قول اللى فى نفسك وعبر عن نفسك