دكان شحاته

فى الحقيقة أنا كنت ناويه احكيلكم عن فيلم الطريق الثورى اللى بطلى الفيلم ثنائى titanic بس دكان شحاته فرض سيطرته على الموقف واتحسم البوست ليه.


الفيلم ده كان عامل دوشة جامده قبل وبعد العرض مره وزاره الداخليه تطلب تعديل نهايه الفيلم ومره الازهر وبالاخص الطرق الصوفيه تستعين بالريس لوقف عرض الفيلم وتصريحات من هنا وتصريحات من هناك عن الفيلم ومش عارفة اذا كان ده ذكاء المخرج علشان يعمل تشويق لدى المشاهد ويصنع هاله حول الفيلم مما يجعلك فى انتظار عرضه ام انها ضربه حظ ؟
المهم انا كنت واحدة من الناس اللى عايزه تعرف الفيلم ده فيه ايه عامل الضجه دى كلها لحد ما نزلاناه من حوالى اسبوعين من الموقع اللى ربنا يخليه للغلابه اللى زى حالاتى اللى مش بيدخلوا سينما طبعا موقع myegy وشوفت الفيلم اللى من وجه نظرى يستاهل انه يكون ليه بوست فى عالمى الخاص .
مع نزول تتر المقدمه نزلت دموع عنيا طبعا علشان رائعه جمال بخيت مش باقى منى غير شويه ضى فى عنيا انا هدهوملك وامشى بصبرى فى المالكوت يمكن فى نورهم تلمحى خطوه تفرق معاكى بين الحياه والوت يااااااااااااااااااااااااااااااه صعبه قوى . القصيده دى انا قريتها فى الدستور اول مره اينعم اتأثرت بيها جدا بس مع صوت احمد سعد حاجه تانى.

خلينا الاول فى التتر طبعا القصيده مؤثره جدا ولكن الاكثر تأثيرا هى الاحداث التى تبدا من 2013 حيث يتوقع المخرج اننا سوف نظل فى نفس الحال وعند نفس النقطه اوباما لسه بيوعد انه يخرج من العراق الى وعد الرئيس مبارك فى 1981 انه لن يبقا فى الحكم الا دورتين فقط وده ذكاء فظيع انه بيقولك كله بيوعد وكله بيتكلم وهو الكلام بفلوس ؟

المشهد الاول مشهد منع التجوال وكأن الشعب المصرى من يومه لا تعرفه هو ممنوع ولا مسموح فقط الرعب من الحكومه الذى يظهر بشده فى صوت طلبه وهو بيقول لابوه الحكومه جاءت خدت الدكتور مؤنس .

المشهد الثانى اللى بجد ما قدرتيش امنع دموعى فيه هو عندما طلب والد شحاته انه يمد يده يجيب صوره الريس جمال علشان تدارى الشرخ اللى موجود فى الحيطه فيرد عليه شحاته انه الشرخ كبير قوى يابا الصوره مش هتقدر تداريه كله عارفين مين الشرخ ده احنا احنا اه احنا مصر اللى بنتغطا بجمال ورغم انه فيه بعده اتنين الا لسه مازلنا بنعيش على انجازاته والشرخ والذل كتر قوى من بعده لدرجه اننا مش قادرين نلم نفسنا باللى باقى منا .

المشهد الثالث مشهد بيع النفس والهوان والذل مشهد باع فيه المصريين كرامتهم بربع فرخه (لا تعليق ).

المشهد الرابع مشهد موت محمود حميده اللى شاف فيه الموت زى الخروف الابيض وشافه صغير قوى وعرف ازاى ما يخافيش من الموت عجبتنى قوى النصيحه اللى قالها لولده لما تكون لوحدك حط عينك على نجمه فى السما وصاحبها عمرك ما تحس انك لوحدك .

المشهد الخامس مشهد بيفكرك بكارثه من الكوارث اللى اتعدونا عليها وكان الكوارث لا تليق الا بشعب مثلنا كارثه احتراق قصر ثقافه بنى سويف اللى لو وزير الثقافه كان مثقف فعلا كان قدم استقالته بعدها فورا ولا يبقا الى يومنا هذا ليجلب لنا العار بأستضافت عازف اسرائيلى او السماح بترجمه كتب عبريه حتى ينال رضا اليونسكو وكأن رضا اليونسكو اهم عنده من رضا الله وكرامته. انا مش هتكلم كتير فى الموضوع ده لانى اصلا مفقوعه من الراجل ده.

المشهد السادس مشهد دفن والد شحاته وبيع اخوات شحاته ليه وكانهم كانوا فى انتظار هذا اليوم حتى يبيعوا دمهم ولحمهم دول حتى ما سابوش ابوهم يستريح فى تربته وفوق راسه واتخانقوا فعلا فعلا كفا بالموت واعظا بس للى يتعظ!

المشهد السابع مشهد قطار البضاعه قد يكون هذا القمح فاسد غير صالح للاستخدام الادمى بس صالح لينا المشهد كله لاتعليق فقط دموع .

المشهد الثامن خايفه ان الواحد يكون فى يوم زى شحاته يضر انه يحلف ان المكان ده مكانه فى الوقت اللى المكان ده بيرفرف عليه علم اسرائيل حسبنا الله ونعم الوكيل فعلا بعنا ارضنا بنفسنا للعدو واكيد هنرجع فى يوم ندور على ارضنا دى بس بعد خراب مالطه .

المشهد التاسع الصيت ولا الغنا اسمع واستفيد الناس عايزه فتوه عايزه بطل ما احنا بقينا فى زمن الانصاص تلاقى نص راجل ربع راجل الناس عايزه راجل بصحيح والله ياكرم غباواه انت بالبق ده بقيت كلك زكاوه احنا فعلا محتاجين قدوه بس مش زى صلاح الدين الابنودى ولا زى جيفارا اللى مشجل خطر عايزين واحد مننا من عصرنا دايق اللى احنا فيه ويمكن مش بالصدفه ولا على سبيل الافيه المضحك ربط اسم صلاح الدين بالابنودى لان فعلا الابنودى يمكن كان بطل فى قصيده الممنوع .

المشهد العاشر المشهد اللى بيزف لك خبرا اننا بقينا فى زمن الحبر والورق اصدق كثيرا من الدم واللحم عندما يستشهد شحاته ببطاقه ابوه علشان يقول لاخواته انه اخوهم وانهم الحاجه الوحيده اللى فضلاله يدارى فيها من غدر الزمن هو حضن اخواته حتى بعد ما الغدر جاء من اخواته بيرد على البرص دول اخواتى يابن .....النهايه اللى بتقولك ان كل اللى احنا فيه دلوقتى ما هو الا اخذ ثار شحاته لم يعد هناك امان اذا كان الغدر من اقرب الناس اليك وكأن الفساد والبطاله وانعدام الثقه والامان والى اخره من فساد ما هو الا ثار لشحاته .
انا شوفت الفيلم كده يا ترى انتوا شفتوه ازاى؟

ومش باقى منى غيرشهقه فى نفس مقطوع وانا صوتى مش مسموع يا حلمنا الموجوع من المرور ممنوع مستنى لما يمر موكب سلاطينك!