بركان الصعيد

طبعا سمعتوا عن بركان الصعيد؟

اه طبعا

طيب واتعملتوا معاه ازاى؟

ابدا حضرتك دى كارثه واحنا جمعنا تبرعات وبطاطين وبعتناها ليهم فى الصعيد

طيب تفتكروا الكارثه دى جمعتنا كلنا كشعب واحد؟

اه طبعا اكيد احنا اولاد بلد واحده ولازم نكون مع بعض فى حاجه زى دى مش تفرق صعيدى ولا بحراوى

طيب هو حضرتك سمعت الخبر منين؟

من التلفزيون وبعدين الجرايد مباشر عالطول وحصريا !

ايه ده هو كان فيه بركان فى الصعيد؟ اكيد صعيد تانى غير اللى انا عايشه فيه!

الحوار الطويل العريض ده كان على قناه otv امبارح الساعه سبعه

المذيعه كانت بتسال الناس وتدخل عليهم طبعا حضرتك سمعت عن بركان الصعيد؟

والشخص من دول يؤكد الخبر طبعا ويوضح للمذيعه ازاى كان دوره فى الكارثه دى وازاى هو وقف مع اخواته الصعايده و ازاى هو سمع الخبر حصريا من التلفزيون وكمان قراه فى الجريده.

البرنامج ده كان اشتغاله للناس افتكر ان الفكره اللى وراه كان المغزى منها انها تثبت للناس انى المصرى ابو العريف

وانه يعرف كل حاجه.

وكأن عار على الواحد انه يكون مش عارف

وكمان الناس بتتكلم بثقه رهيبه يعنى الموضوع بجد لحد ما تظهر المذيعه فى اخر البرنامج لتعلن انها كانت بتشتغل الناس دى.

انا الموضوع كان ممكن يعدى عليا عادى موقف كوميدى وخلاص

بس بعد قليل من التدقيق والتفحيص والتفعيص برضه لقيت ان الموضوع ده ثقافه عندنا فى الشعب المصرى

يعنى ايه وضحى كلامك؟

اقول لحضرتك ان المصرى صعب عليه جدا يقول مش عارف او مش فاهم ولو قال كده يبقا تقصير منه

احكيلكم موقف والموقف ده اتحكالى من دكتور كان عايش فى امريكا

بيقولى انه فى يوم كان معزوم على العشاء فى مطعم والمهم هناك قدموا اكله غريبه جدا والدكتور ده الله يمسيه بالخير مصرى ابا عن جد يعنى ايه يعنى ابو العريف مستوطن جواه واكل وشارب وواخد شقه اجار جديد كمان.

المهم الدكتور ده هيموت ويسال ايه الاكله دى بس ازاى دى عيبه فى حقه انه يطلع مش عارف حاجه المهم الدكتور اكلها مضرا وبعد ما اكلها يصاب بقى شديد وغثيان واول ما فاق حب يسال هو ايه اللى انا اكلته قالوله شربه ضفادع

تخيلوا بقا كان منظره ايه ؟

المهم الدكتور ده بعدين اتعلم درس بس بعد ايه بعد خراب مالطه وبقى كل مايروح مطعم يسال عن الطين ومين زرعه

والله مش عيب الواحد يسال عن حاجه مش عارفها او مش واثق فيها

بس العيب ان احنا نفتى او نقول نعرف اه وحصل وشوفنا وشاركنا وبعتنا وسوينا

واحنا ولا نعرف حاجه اصلا.

ياريت يا ابو العريف ترحل شويه عننا وتشوف شعب غيرنا.