2009/03/18

يا وطن منين اشتريك؟


ياللي من البحيرة وياللي من أخر الصعيد ياللي من العريش الحرة أو من بور سعيد هنوا بعضيكم وشاركوا جمعنا السعيد سينا رجعت كامله لينا ومصر اليوم مصر اليوم في عيد.

طيب بزمتكم وسامحونى فى السؤال حد فاكر اليوم ده كان امتى؟

او ليه؟ انا عن نفسى مش فاكره تاه منى اليوم وسط الزحمه تاه مع حاجات كتير تاهت عننا.

وتقريبا الريس والله اعلم حس بالتوه اللى احنا فيها فحب يفكر شعبه ويصحيه من الزهايمر ده ويفكره بانجازاته العظيمه وبيوم تحرير طابه او عودتها مش هتفرق كتير اهم حاجه انها عادت حتى لو كانت عودتها مجرد حبر على ورق مش عوده حقيقيه.

المهم مش ده موضوعنا خالص موضوعنا .

ان سينا رجعت كامله لينا ومصر بكره فى اجازه.وكأن الاحتفال عندنا بطابه اللى علىفكره اول مره نحتفل بيها هو يوم اجازه !

بس تعرفوا ايه المشكله؟ المشكله ان احنا بنحتفل بعوده جزء من الوطن فى الوقت نفسه اللى بنبيع فيه الوطن.

فى الوقت الذى اوشكت فيه مصر كوطن على الاختفاء لتعود الينا فى صوره صكوك!

فى الوقت اللى بنعرض فيه وطنا للبيع ومن حق القاصى والدانى ان يوقف يتفرج ويشترى لو عاجبه.

ونعمل زى عواد اللى باع ارضه بس ياترى حد وقتها هيزفنا و لا ما احنا ما خلاص اتبعنا احنا كمان مع الوطن؟

بس انا مش هسمح لحد انه يبعنى وحقى فى بلدى هاخده واستفاد بيه لو ناوين يقسموا مصر وطنى الكبير فى صكوك هاخد حقى منها بس انا اللى اختار اخد حقى ايه واعمل بيه ايه ؟


ايه الكلام ده اللى انا بقوله هو انا اتجننت ولا ايه ولا بهيس

طيب فيها ايه ما تيجى تهيسى بصوت عالى وشوفى هتعملى ايه بحقك فى بلدك هما مش عايزينها صكوك خلاص اختارى واحلمى وشوفى هتعملى ايه بحقك.


اه اه اعمل ايه اعمل ايه؟

بس خلاص فكرت اولا لو فكرنا نقسم البلد على 80مليون راكب قصدى مواطن فقولى حقى يطلع 3 متر فى البلد

حلو اينعم قليل 3 متر بس انا هوظفهم صح وهاختار موقع 3متر صح.

هختار مدخل البلد عند تقاطع الطرق وهاخد ال3 متر بتوعى واقف هناك وكل عربيه او توك توك او لورى او بنى ادم او بنى حيوان اخد منه جمرك او ثمن انه هيضع رجليه او هيعدى على ال3 متر بيتوعى.

ويا سلام بقا لو لورى معدى على ال3متر وشايل ومحمل هاخد طبعا تمن الحموله امال هى مش هتحمل على ارضى وملكى ما ممكن الحموله دى تكون زياده حبتين تؤدى الى سقوط مفأجى فى ال3متر بتوعى يبقا خلاص اى حاجه هتعدى هأخد تمنها .

وخلال سنه اكون عملت خميره محترمه من وراء ال3متر دول وبعدين اروح اعمل ايه؟

اروح اشترى ارض فى الصحراء ما اكيد الصحراء دى هتكون بره لعبه الصكوك على اساس انها مش من الوطن يعنى او مصر عامله نفسها مش واخده بالها.

بس انا هأخد بالى وانا بقا معايا فلوس هروح اعمل ايه ؟

ازرعها نخل ويطلع النخل بلح وجريد وليف

البلح اعمل منه عجوه وايس كريم بلح وحلاوه محشيه بلح واصدر بقا ما الارض اللى انا اشتريتها كتير وعلى فكره انا هشتريها بفلوسى يعنى مش هضحك على حد .

والجريد اعمل منه كراسى جريد وحاجات تانى كنوع من الاساس وابيعها للنوادى وكده.

والليف ده استخداماته عديده يعنى مشروع ناجح 100%

وبعدين اكون اشتريت لنفسى وطن بس مش هعمل زى صاحب المحل وافرط فيه

ايه ده انتى لسه بتهيسى مين صاحب المحل ده؟

اصبرى يا ستى هقولك ما تستعجليش على رزقك.

صاحب المحل ده واحد جاء قاله ممكن احط الكرسى ده عندك فى المحل واشترى المساحه اللى هيأخدها الكرسى ؟

صاحب المحل ده وافق وباعله وقال مش هيخسر ما انا فى الاساس صاحب المحل وهو يادوب هيأخد مساحه الكرسى

تانى يوم جاء وقاله ممكن احط الكرسى التانى ده عندك واشترى مساحه الكرسى؟

صاحب المحل وافق برضه لانه مقتنع ان لسه المحل بتاعه.

كل يوم يجيله يقوله عايز احط الكرسى ده عندك لحد ما ملاء المحل بالكراسى بتاعته وخد المحل منه وصاحب المحل بقى بره بره اللعبه خالص.

عارفه مين صاحب المحل احنا المصريين وياخوفى صاحب الكرسى يأخد البلد مننا وساعتها مش هنلاقى وطن

وننادى باعلى صوت ياوطن منين اشتريك بعد ما فرطت فيك؟


الا صحيح هتعمل ايه انت بصكوك ؟

هناك تعليقان (2):

  1. غير معرف18/3/09 10:27

    ابداء كلامى بصلاه على النبى
    وبعدين البوست يضحك ويبكى فى نفس الوقت
    بس سؤال هو بجد بكره اجازه؟
    ******************
    تانى حاجه مين قالك ان احنا معملناش زى بتاع المحل احنا فعلا عملنا كده امال الغاز الطبيعى والاسمنت وكل خير بلدنا ده اسمه ايه مش بيع وتفريط فى الوطن؟
    *******************
    بالنسبه لحقى فى البلد اللى هو فى صوره صكوك
    اذا كانت البلد هتمشى حكايه التوزيع ده بالشرع والدين فللذكر مثل حظ الانثيين
    يعنى اذا كنتى انتى هتأخدى 3متر فانا 6متر
    بس هأخده فى مجمع التحرير وشوفى انتى بقا كل اللى هيعدى يدفع خمسه جنيه والحسابه بتحسب
    وفى ظرف سنه زيك برضه هكون عملت خميره محترمه بس مش هعملك زيك لانك انتى لسه عايشه فى افلام زمان انور وجدى وعلشان بلدى وخاطر بلدى انا عايزك تكبر ياولدى والكلام الحمضان ده
    انا ياستى اولا هعملك توكيل ب6متر ليكى حريه التصرف فيهم من بعدى
    وهسافر امريكا اكمل دراستى فى قسم هندسى محترم واشتغل فى منظومه محترمه
    وبعدين انا مش هسافر عند حد غريب علشان ماتقولليش مصر وكده
    وعلى راى الارموطى مصر ام الدنيا يعنى ام اوربا ويعنى ام امريكا واللى جاب امريكا يعنى من الاخر انا هسافر عند بت امى
    هههههههههههههه
    ***********************
    وبعدين هما مش بيقولوا احسبها صح تعيشها صح
    ادينى حسبتها وان شاء الله هعيشها صح
    *********************
    وبعدين على عكسك تماما ان مش خايف من حكايه عواد يبيع ارضه انا خايف ان صابر يطلع دزمه ويرجع فى كلامه ومش يبيع لانى عشت معاكى فى الحلم
    سمعينى صلاه على النبى بقا

    حماده

    ردحذف
  2. عليك افضل الصلاه والسلام ياحبييبى يارسول الله

    منور ياواد عمى

    بالنسبه لكلامك فامش هرد عليك هنا

    يالا
    السلام ختام

    ردحذف

قول اللى فى نفسك وعبر عن نفسك